ލަމްހާ ދޫކޮށްލި މައްސަލަ ހައިކޯޓުން ނުބެލި
މަޖިލީހުން ހެދީ ދުނިޔޭގެ ރިކޯޑެއްތޯ މައުމޫން ސުވާލުކުރައްވައިފި
ފައިސާގެ މުއާމަލާތްކުރުމަށް އިންޑީއާ އާއި ރާއްޖެ އެއްބަސްވުމަކަށް
ވޯލްޑް އެޗްއާރުޑީ ކޮންގްރެސް އާއި އެމްޕްލޯޔާ ބްރޭންޑިން އިންސްޓިޓިއުޓްއިން ދޭ ޝަރަފުވެރި އެވޯޑް ކަމަށްވާ "އޭޝިއާސް ބެސްޓް އެމްޕްލޯޔާ ބްރޭންޑް އެވޯޑް" އަނެއްކާ ވެސް ބޭންކް އޮފް މޯލްޑިވްސް( ބީއެމްއެލް) އަށް ލިބިއްޖެ އެވެ.
ހަތަރު ވަނަ ފަހަރަށް ބީއެމްއެލްއަށް ލިބުނުއިރު، މި އެވޯޑް ބޭންކާ ހަވާލުކޮށްފައިވަނީ މިއަދު ބޭއްވި ހާއްސަ ހަފްލާއެއްގެ ތެރެއިންނެވެ.
ބޭންކް އޮފް މޯލްޑިވްސްގެ ސިޔާސަތުތަކާއި ވަޒީފާ ދިނުމާއި، މުވައްޒަފުން ތަމްރީނުކުރުމުގެ އިތުރުން ހުނަރުވެރި މުވައްޒަފުން ވަޒީފާގައި ދެމެހެއްޓުމަށް އެކުންފުނިން ކުރާ މަސައްކަތުގެ ސަބަބުން އޭޝިއާ ސަރަހައްދުގައި ވަޒީފާ އަދާކުރުމަށް އެންމެ ރަނގަޅު އެއް ކުންފުންޏަކަށް ބޭންކް ހޮވިފައިވާ ކަމަށް ބީއެމްއެލްއިން ބުންޏެވެ.
މީގެ އިތުރުން މުޅި ދުނިޔެއަށް ވެސް ދިމާވި ކޮވިޑުގެ ހާލަތުގައި ވެސް މުވައްޒަފުންނަށް ބޭނުންވާ ކަންކަން ފުރިހަމަކުރުމަށް ބޭންކުން ކޮށްފައިވާ މަސައްކަތްތައް ފާހަގަކޮށްފައިވާ ކަމަށް ވެސް ބީއެމްއެލްއިން ބުންޏެވެ.
މިގޮތުން ކޮންމެ އަހަރަކު ދޭ ވޯލްޑް އެޗްއާރުޑީ ކޮންގްރެސް އެވޯޑަކީ މުވައްޒަފުންނާ ގުޅޭ ކަންކަމުގައި މުވައްސަސާތަކުން އަމަލުކުރަމުންދާ އެންމެ ރަނގަޅު ސިޔާސަތުތަކަށް ރިއާޔަތްކޮށް އެކިއެކި ދާއިރާތަކަށް ބަހާލައިގެން ދޭ އެވޯޑެކެވެ.
އޮންލައިންކޮށް ބޭއްވުނު މި ހަފްލާގައި ބީއެމްއެލްގެ ފަރާތުން މި އެވޯޑާ ހަވާލުވެފައިވަނީ ހެޑް އޮފް ޓެލެންޓް އެންޑް ޓޯޓަލް ރިވޯޑްސް، މުޙައްމަދު މާއިޒްއާއި، ހެޑް އޮފް ބްރާންޗެސް އެންޑް ސާވިސް ސެންޓާސް، ޙުސައިން ރަޝީދުގެ އިތުރުން ހެޑް އޮފް ކަސްޓަމާ ޕޭމަންޓްސް އެންޑް ސެޓްލްމަންޓް ހުޒާތު އަލީ އެވެ.
ރާއްޖޭގައި ބެންކުގެ ހިދުމަތް ފޯރުކޮށްދިނުމުގައި އެންމެ ބޮޑު ބެންކުގެ ގޮތުގައި ބީއެމްއެލް ފާހަގަކުރެވޭއިރު، ބީއެމްއެލްއިން ދަނީ ދިވެހިންނަށް ވަޒީފާގެ ގިނަ ފުރުސަތުތަކެއް ވެސް ތަނަވަސް ކޮށްދެމުންނެވެ. ހަމައެހެންމެ އެކުންފުނީގައި މަސައްކަތް ކުރާ މުވައްޒަފުންނަކީ ގާބިލު، މުވައްޒަފުންގެ ގޮތުގައި ހެދުމަށް ބީއެމްއެލްއިން ގިނަ މަސައްކަތްތަކެއް ކުރަމުން ދެއެވެ.
