ނެޓްފްލިކްސްއިން ވަނީ ގިނަ އަދަދެއްގެ އޮރިޖިނަލް ޓީވީ ސީރިޒްތަކާ ފިލްމުތަކެއް މިއަހަރު ރިލީޒް ކުރާނެ ކަމަށް ވައުދުވެފަ އެވެ.

މި ގޮތުން ޑައިރެކްޓަ އަދި ރައިޓާ އެޑަމް މެކްކޭގެ "ޑޯންޓް ލުކް އަޕް" އަކީ ގިނަ އަދަދެއްގެ ތަރިން ފެނިގެންދާނެ ފިލްމެކެވެ. ނެޓްފްލިކްސް ކޮމެޑީ މި ފިލްމުން އޮސްކާ ހާސިލްކޮށްފައިވާ ތަރި ލިއޮނާޑޯ ޑިކެޕްރިއޯ އާއި ޖެނިފާ ލޯރެންސް ލީޑުން ފެނިގެންދާނެ އެވެ.

މި ސީރީޒްގެ ހުރިހާ މަސައްކަތެއް ފަށަން ތައްޔާރުވެފައިވާއިރު މި ތަރިން ސީރީޒް ކުޅެނީ ކުޑަ މުސާރައަކަށް ވެސް ނޫނެވެ.

މި ދެ ތަރިންނަން އާއްމު ގޮތެއްގައި މުސާރައިގެ ގޮތުގައި 20 މިލިއަން ޑޮލަރު ލިބޭނެ އެވެ. އަދި މި ފިލްމުގައި ލިއޮނާޑޯއަށް 30 މިލިއަން ޑޮލަރު ލިބޭއިރު، ޖެނިފާއަށް 25 މިލިއަން ޑޮލަރުގެ މުސާރައެއް ލިބެ އެވެ. މި މުސާރައަކީ ކުރިން މި ދެ ތަރިންނަށް ލިބުނު މުސާރައާ އަޅާބަލާއިރު ބަލާއިރު ބޮޑު އަދަދެކެވެ.

އެޑަމް މެކްކޭ ލިޔެ ޑައިރެކްޓްކުރާ "ޑޯންޓް ލުކް އަޕް" އަކީ ސައިންސް ފިކްޝަން ބްލެކް ކޮމެޑީއެކެވެ.

މި ފިލްމުގައި ދައްކުވައިދޭނީ ދުނިޔެއަށް ވެއްޓޭ ގިނި ހިލައެއްގެ ވާހަކަ މީހުންގެ ސަމާލުކަމަށް ގެންނަން ދެ މީހަކު ކުރާ ދަތުރެއްގެ ވާހަކަތަކެވެ. 2019 ވަނަ އަހަރު އިއުލާންކުރި މި ފިލްމު މިއަހަރު ނެޓްފްލިކްސަށް އަންނާނެ ކަމަށް އިއުލާން ކޮށްފައި ވީނަމަވެސް އަދި ތާރީހެއް އިއުލާން ކޮށްފައެއް ނުވެ އެވެ.