ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ)ގެ ވަޒީފާއިން ދީނީ އިލްމުވެރިޔާ ޑރ. މުހައްމަދު އިޔާޒު އަބްދުއްލަތީފް ވަޒީފާއިން ވަކިކުރުމަކީ އިންސާފުވެރި ފިޔަވަޅެއްކަމަށް ގަބޫލުނުކުރައްވާ ކަމަށް ހޯމް މިނިސްޓަރު އިމްރާން އަބުދުﷲ ވިދާޅުވެއްޖެ އެވެ.

މިސަރުކާރުގެ ކޯލިޝަން އެއް ޕާޓީކަމަށްވާ އަދާލަތު ޕާޓީގެ ރައީސް އިމްރާން އަބްދުﷲ މިއަދު ކުރެއްވި ޓުވީޓެއްގައި ވިދާޅުވީ އެމްއެންޔޫއިން ޑރ. އިޔާޒު ވަޒީފާއިން ވަކި ކޮށްފައިވަނީ އިންސާފުވެރިކަމާއެކު ނޫން ކަމަށެވެ. އަދި ދީނީ ހިޔާލު ތަފާތުވުންތަކުގައި މުއައްސަސާތަކުން ބަހުސްކޮށް ރީތި ގޮތުގައި އެކަންކަމަށް ހައްލު ހޯދޭނެ ކަމަށް ވެސް އިމްރާން ވިދާޅުވި އެވެ.

ޑރ. އިޔާޒަކީ ރާއްޖޭގައި އިސްލާމިކް ޝަރީއަތް ހަރުދަނާ ކުރުމަށް ދީނީ އިލްމުވެރިއެއްގެ ހައިސިއްޔަތު ގިނަ ހިދުމަތްތަކެއް ކުރައްވާ ބޭފުޅެއް ކަމަށް އޭނާ ވިދާޅުވި އެވެ.

ޑރ. އިޔާޒުގެ ދިފާއުގައި އިމްރާން ޓުވީޓް ކުރައްވާފައިވާއިރު ކޯލިޝަންނުގައި ހިމެނޭ މައި ޕާޓީއިން ވަނީ ޑރ. އިޔާޒުއާ ދެކޮޅަށް ފިޔަވަޅު އެޅުމަށް ގޮވާލާފަ އެވެ. އަދި ޑރ. އިޔާޒު އާ ދެކޮޅަށް ފިޔަވަޅު އެޅުމަށް ގޮވާލާފައިވަނީ އަންހެނުން ހިތާނު ކުރުމަށް އޭނާ ހިތްވަރުދޭ ކަމަށް ބުނެ އެވެ.

މިމައްސަލާގައި މަގާމުން ވަކިކުރިއިރު، ޑރ. އިޔާޒު އެމްއެންޔޫގައި އަދާކުރަމުން ދިޔައީ އެސިސްޓެންޓް ޕްރޮފެސަރުގެ ވަޒީފާ އެވެ. މިއަހަރުގެ މާޗް މަހު 14 ދުވަހަށް އިޔާޒު އެ މަގާމުން ސަސްޕެންޑް ވެސް ކުރި އެވެ. އޭރު ސަސްޕެންޑް ކުރީ ސޯޝަލް މީޑިއާގައި ޖެހި ޕޯސްޓްތަކަކާ ގުޅިގެންނެވެ. އެ ފަހަރު އިޔާޒުގެ ސަސްޕެންޝަން އުވާލީ އެފަދަ ކަމެއް ތަކުރާރުކޮށްފިނަމަ ވަޒީފާއިން ވަކިކުރާނެ ކަމުގެ ފަހުގެ އިންޒާރު ދިނުމަށްފަހު އެވެ.

މިއަދު ޑރ. އިޔާޒު ވަޒީފާއިން ވަކިކޮށްފައި ވަނީ އަންހެނުން ހިތާނު ކުރުމާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓަކާއި ގުޅިގެންނެވެ. އަދި އެ ޕޯސްޓް ކުރެވި ސަބަބު އިޔާޒު ވަނީ ސާފުކޮށްދެއްވާފަ އެވެ. އޭނާ އަންހެނުން ހިތާނު ކުރުމަކީ އޭނާ ހިތްވަރު ދެއްވާ ކަމެއްކަމުގައި ނޫން ކަމަށެވެ. އަދި އެކަން ޕްރޮމޯޓް ވެސް ނުކުރައްވާ ކަމަށެވެ. އެގޮތަށް ޓުވީޓެއް ކުރެއްވީ އާންމުންގެ މީހަކު ކުރި ސުވާލަކާ ގުޅިގެން އަންހެނުން ހިތާނު ކުރުން އިސްލާމް ދީނުގައި އޮންނަނީ ކިހިނެތްކަން އަންގައި ދޭން ކަމަށް ޑރ. އިޔާޒު ވަނީ ވިދާޅުވެފަ އެވެ.

އެ ޓުވީޓާ ގުޅިގެން އާއްމުންގެ ފާޑު ކިޔުން އަމާޒުވުމުން ޑރ. އިޔާޒު ވަނީ މާފަށް އެދިވަޑައިގެން ބަޔާނެއް ނެރެފަ އެވެ. އެ ބަޔާނުގައި ޑރ. އިޔާޒު ވިދާޅުވީ، އަންހެނުން ހިތާނު ކުރުމަކީ އޭނާ ވަކާލާތުކުރެއްވި އަދި ވަކާލާތުކުރައްވާ ކަމެއް ނޫން ކަމަށާއި އެއީ ރާއްޖެއިން ނެތިގޮސްފައިވާ އާދައެއް ކަމުގައި ބެލެވޭއިރު، އެ އާދަ އަނބުރާ އިއާދަ ކުރަން ވެސް ވަކާލާތު ނުކުރައްވާ ކަމަށެވެ.

އެމްއެންޔޫގެ ވައިސް ޗާންސެލާ ޑރ. މުހައްމަދު ޝަރީފް ވިދާޅުވީ އިޔާޒުގެ މައްސަލަ ބެލީ އެމްއެންޔޫގެ ހާއްސަ ކޮމިޓީ އަކުން ކަމަށެވެ. ކޮމިޓީގައި ދީނީ އިލްމުވެރިންގެ އިތުރުން އެކި ދާއިރާތަކުން ތައުލީމް ހާސިލް ކުރައްވާފައިވާ ބޭފުޅުން ވެސް ހިމެނޭ ކަމަށެވެ.