އެމްޑީޕީގެ ރައީސް މުހައްމަދު ނަޝީދާ ހިޔާލު ތަފާތުވާ މީހުން އެމްޑީޕީން ވަކިކުރާނެ ކަމުގެ އިންޒާރު އެމަނިކުފާނު ދެއްވައިފި އެވެ.

ނަޝީދުގެ ނުރަސްމީ ޓްވިޓާ އެކައުންޓު، އެލެކްސް އަހްމަދު އިން މިރޭ ކުރި ޓްވީޓެއްގައި އެމަނިކުފާނު ވިދާޅުވީ އެމްޑީޕީ ބައިބައިވާނެ ސަބަބެއް ނުވިސްނޭ ކަމަށެވެ.

ނަޝީދު ވިދާޅުވީ ފިޔަވަޅު އަޅާ ކޮމިޓީގެ ބޭނުމަކީ ޕާޓީގެ އަސާސްތަކާ ހިލާފުވާ މެމްބަރުންނަށް ފިޔަވަޅު އެޅުން ކަމަށެވެ. އަދި އެފަދަ މީހުން ޕާޓީން ވަކި ކުރުމަކީ އެ ކޮމިޓީން ކުރާނެ ކަމެއް ކަމަށް ވެސް އެމަނިކުފާނު ވިދާޅުވި އެވެ.

އެމްޑީޕީ އަކީ މެމްބަރުންގެ ޕާޓީއެއް ކަމަށާއި އެހެންކަމުން ކަންކަން ނިންމާނީ މެމްބަރުންގެ ވޯޓުން ކަމަށް އެމަނިކުފާނު ވިދާޅުވި އެވެ.

އަދި ކަންކަން ނިންމާނީ ޕާލެމެންޓްރީ ގްރޫޕާއި ގައުމީ މަޖިލީހުން ނޫން ކަމަށް ވެސް އެމަނިކުފާނު ވިދާޅުވި އެވެ.

ނަޝީދު ވިދާޅުވީ އެމްޑީޕީގެ ޗެއާޕާސަން ހަސަން ލަތީފް ވިދާޅުވީ ރަނގަޅަށް ކަމަށާއި ސަރުކާރުން ބޭނުންވީ އެމްއެމްޕީއާރްސީގެ މައްސަލަ އާއި މަރުތަކުގެ މައްސަލަ އޮއްބާލަން ކަމަށެވެ.

އެމްއެމްޕީއާރްސީގެ މައްސަލާގައި ހަސަން ލަތީފް ދެއްކެވި ވާހަކައަށް ނަޝީދު ތާއީދު ކުރެއްވިއިރު، ރައީސް ޔާމީންގެ ވެރިކަން ބަދަލުކުރުމަށް މަސައްކަތް ކުރުމަށް އުފެއްދި މޯލްޑިވްސް ޔުނައިޓެޑް އޮޕޮޒިޝަންގެ ހަރަކާތްތައް ހިންގުމަށް ފަސް މިލިއަން ރުފިޔާ ހަސަން ލަތީފާ ހަވާލުކޮށްފައިވާ ކަމަށް އެސްއޯއެފްގެ އިސް ހިއްސާދާރު މުހައްމަދު އައްލާމް ލަތީފް ވަނީ ބުނެފަ އެވެ. އެ މައުލޫމާތު އައްލާމް ވަނީ ފުލުހުންނާއި އެސެޓްރިކަވަރީ ކޮމިޝަނުން ކުރާ ތަހުގީގަށް ވެސް ދީފަ އެވެ.

ނަމަވެސް ހިޔާނާތުގެ ފައިސާ ލިބުނު މީހުންގެ ލިސްޓް ނެރުނުއިރު، ހަސަން ލަތީފްގެ ނަން ވަނީ އެ ލިސްޓުން އުނިކޮށްފަ އެވެ.

އެމްޑީޕީ ތެރެ ބައިބައިވެ ދެ ފެކްޝަން ވަނީ އުފެދިފަ އެވެ. ރައީސް ސޯލިހުގެ ފެކްޝަނާއި ނަޝީދުގެ ފެކްޝަނާ ދެމެދު ބަހުގެ ހަމަލާތަކެއް އަންނަނީ ރައްދު ކުރެވެމުންނެވެ.