މިދިޔަ މެއި މަހުގެ ހަ ވަނަ ދުވަހުގެ ރޭ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަަދު ނަޝީދަށް ދިން ހަމަލާގެ ތަހުގީގު ހިގާގޮތް ބެލުމަށްޓަކައި ''މެއި ހައެއް'' ގެ ނަމުގައި ޚާއްސަ ކޮމިޓީއެއް އުފައްދަން އެމްޑީޕީގެ ގައުމީ މަޖިލީހުން ފާސްކޮށްފި އެވެ.

އުނގޫފާރު ދާއިރާގެ މެމްބަރު މުހައްމަދު ވަހީދު ހުށަހެޅުއްވި އެ ހުށަހެޅުމަށް ތާއީދު ކުރެއްވީ މަކުނުދޫ ދާއިރާގެ ރައީސް އަހްމަދު މައުސޫމެވެ

ކޮމިޓީގައި ހިމެނިވަޑައިގަންނަވާނީ ރައީސް ނަޝީދުގެ ފަރާތުން ކަނޑައަޅުއްވާ މެމްބަރަކާއި ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ހަސަން އަފީފާއި ފޮނަދޫ ދާއިރާގެ މެމްބަރު މޫސާ ސިރާޖާއި ހެންވޭރު އުތުރު ދާއިރާގެ މެމްބަރު އިބްރާހީމް މުއިއްޒު އަދި ކުރީގެ ޑިފެންސް މިނިސްޓަރު އަމީން ފައިސަލެވެ.

ގަރާރުގައި ފުރަތަމަ ކަމެއްގެ ގޮތުގައި ބުނެފައިވަނީ، މެއި ހަ ވަނަ ދުވަހުގެ ހާދިސާގެ ތަހުގީގު ހިނގާ ގޮތް ގާތުން ބެލުމެވެ. ދެވަނަ ކަމެއްގެ ގޮތުގައި ބުނެފައިވަނީ، ކުރިން ހިނގާދިޔަ ނުރައްކާތެރި ގޮތް ނޭގޭ މަރުތަކުގެ ހަގީގަތް މިއަދާ ހަަމައަށްވެސް ނޭގި އޮތުމަކީ ކަންބޮޑުވާ ކަމެއް ކަމަށާއި، ދައުލަތުގެ އެއް ވެރިޔާއަށް އަމާޒުކޮށް، ދިން މިހަމަލާގެ ހަގީގަތް ނުހޯދިއްޖެ ނަމަ އެމްޑީޕީ ދައުލަތެއްގެ ގޮތުގައި ދެކޭ ދިވެހި ދައުލަތުގެ ސިފަތައް ގެއްލިގެންދާނެ ކަމުގެ ކަންބޮޑުވުން އެބައޮތްކަން ހާމަކުރުމެވެ.

ހަމަލާއަށް ފަންޑު ކުރީ ކޮންބައެއްކަން ތަހުގީގަށް މިހާތަނަށް ހޯދިފައިނުވާތީ އެކަމާ ކަންބޮޑުވާ ކަމަށާއި، ހަމަލާގެ ހަގީގަތް އޮޅޭގޮތަށް ބައެއް ފަރާތްތަކުން ވާހަކަ ދައްކަމުން އަންނާތީ ކަންބޮޑުވާ ކަމަށްވެސް އެ ގަރާރުގައި ވަނީ ފާހަގަކޮށްފަ އެވެ.