އައްޑޫއަށް އިނގިރޭސިވިލާތުގެ ކޮންސުލޭޓެއް ބޭނުމެއް ނުވާކަމަށް އެ ގައުމުން ރާއްޖެއަށް ކަނޑައާޅާފައި ހުންނަ ސަފީރު، ކެރަން ރޮސްލާ ވިދާޅުވެއްޖެ އެވެ.

ޓްވިޓާގައި މީހަކު ކުރި ސުވާލަކަށް ޖަވާބު ދެއްވަމުން ސަފީރު ކެރަން ރޮސްލާ ވިދާޅުވީ އައްޑުއަށް އިނގިރޭސި ކޮންސުލޭޓެއް ބޭނުންވާ ކަމަށް ދެކެވަޑައި ނުގަންނަވާ ކަމަށެވެ.

ކުރިން އައްޑޫގައި ރޯޔަލް އެއާފޯސް ބޭސްއެއް ހިންގި ގައުމުގެ ސަފީރު މިހެން ވިދާޅުވެފައިވާއިރު، އައްޑޫގައި އިންޑިއާގެ ކޮންސިއުލޭޓެއް ގާއިމުކުރަން އެ ގައުމުގެ ކެބިނެޓުން ވަނީ ފާސްކޮށްފަ އެވެ.

ރާއްޖޭގައި ހުންނަ އިންޑިއާގެ ހައިކޮމިޝަނުން ނެރުނު ބަޔާނެއްގައި ބުނީ އައްޑޫގައި ކޮންސިއުލޭޓް އޮފީހެއް ހެދުމަށް ނިންމީ އިންޑިއާގެ ސަރުކާރުން ގެންގުޅޭ "ނެއިބަހުޑް ފަސްޓް ޕޮލިސީ" އާއި "ސެކިއުރިޓީ އެންޑް ގްރޯތު ފޯ އޯލް އިން ދަ ރީޖަން"ގެ އަމާޒުގައި ރާއްޖެ އަކީ މުހިންމު ދައުރެއް އަދާކުރާ ގައުމަކަށްވުމުން ކަމަށެވެ.

އިންޑިއާގެ ކޮންސިއުލޭޓް އޮފީހެއް ހުޅުވުމަށް ނިންމާފައި މިވަނީ 200 މިލިއަން ޑޮލަރުގެ މަޝްރޫއުތަކެއް އެ ގައުމުގެ އެހީގައި އައްޑޫގައި ފަށާފައި ވަނިކޮށެވެ.

މޯދީ ރިޔާސަތު ބެލެހެއްޓި ކެބިނެޓް ބައްދަލުވުމުގައި ނިންމީ އައްޑޫގައި ކޮންސިއުލޭޓް އޮފީހެއް ހެދުމަށް އިންޑިއާއިން ބޭނުންވި ނަމަވެސް އެކަމުގެ އަމަލީ މަސައްކަތް ފަށާނީ ދިވެހި ސަރުކާރުން ހުއްދަ ދިނުމުން ކަމަށެވެ. ކޮންސިއުލޭޓް އޮފީހެއް އައްޑޫގައި ހުޅުވުމުން އިންޑިއާ އަށް ދަތުރުކުރަން ބޭނުންވާ އައްޑޫގެ ރައްޔިތުންނަށް ފަސޭހައިން ވިސާ ލިބޭނެ އިންތިޒާމުތަކެއް ހަމަޖެހިގެންދާނެ ކަމަށް އެގައުމުގެ ސަރުކާރުން ވަނީ ބުނެފަ އެވެ.