ކްރިސްޓޮފާ ނޯލަންގެ އެންމެ ފަހުގެ ބްލޮކްބަސްޓާ ފިލްމު "ދަ އޮޑިސީ" އިން ހޮލީވުޑްގެ ތާރީހީ ރެކޯޑެއް މުގުރާލައިފި އެވެ. މި ފިލްމު މިހާރު ވަނީ ހޮލީވުޑްގެ ތާރީހުގައި އެންމެ ބޮޑު އާމްދަނީއެއް ހޯދި 'އާރް-ރޭޓެޑް' ފިލްމުގެ މަގާމު ހޯދާފަ އެވެ.

މެޓް ޑޭމަން ލީޑް ރޯލުން ފެނިގެންދާ މި ފިލްމަށް މިހާތަނަށް 1.35 ބިލިއަން ޑޮލަރުގެ އާމްދަނީއެއް ވަނީ ލިބިފަ އެވެ. މިއާއެކު، މީގެ ކުރިން މި ރެކޯޑު އޮތް 2024 ވަނަ އަހަރުގެ ކާމިޔާބު ފިލްމު "ޑެޑްޕޫލް އެންޑް ވޮލްވަރިން"ގެ 1.338 ބިލިއަން ޑޮލަރުގެ ރެކޯޑު މި ފިލްމުން ވަނީ މުގުރާލާފަ އެވެ.

ޖުލައި 17 ގައި ރިލީޒްކުރި މި ފިލްމު ވަނީ ވަރަށް ކުރު މުއްދަތެއްގެ ތެރޭގައި ދުނިޔޭގެ ބޮކްސް އޮފީހުގައި ބޮޑު މަގުބޫލުކަމެއް ހޯދާފަ އެވެ.

ޗައިނާގައި ފިލްމު ރިލީޒް ކުރުން ލަސްވި ނަމަވެސް، އެ ގައުމުގައި ލިބުނު ބޮޑު ތަރުހީބާއެކު ފިލްމުގެ އާމްދަނީ ވަނީ އިތުރަށް މައްޗަށް ގޮސްފަ އެވެ. މި ފިލްމު 1.5 ބިލިއަން ޑޮލަރަށްވުރެ މަތީ އަދަދަކަށް ވާސިލުވާނެ ކަމަށް ލަފާކުރެވެ އެވެ.

މި ކާމިޔާބީއާ ގުޅިގެން "ޑެޑްޕޫލް އެންޑް ވޮލްވަރިން"ގެ ތަރި ރަޔަން ރޭނޯލްޑްސް ވެސް ވަނީ ސޯޝަލް މީޑިއާ މެދުވެރިކޮށް "ދަ އޮޑިސީ"ގެ މުޅި ޓީމަށް މަރުހަބާ ކިޔާފަ އެވެ.

މަޝްހޫރު ޅެމެއްގެ މައްޗަށް ބިނާކޮށް އުފައްދާފައިވާ މި ފިލްމުގައި މެޓް ޑޭމަންގެ އިތުރުން ވެސް ހޮލީވުޑްގެ އެތައް މަޝްހޫރު ތަރިންނެއް ހިމެނެ އެވެ. އޭގެ ތެރޭގައި އޭން ހަތަވޭ، ރޮބަޓް ޕެޓިންސަން، ޓޮމް ހޮލަންޑް އަދި ޒެންޑަޔާ ހިމެނެ އެވެ.

މި ފިލްމަށް ފާޑުކިޔުންތެރިންގެ ފަރާތުން ބޮޑު ތަރުހީބެއް ލިބިފައިވާއިރު، ކުރިއަށް އޮތް އޮސްކާ އެވޯޑްސްގައި މި ފިލްމަކީ ވަރުގަދަ ވާދަވެރިއަކަށް ވާނެ ކަމަށް ބެލެވެ އެވެ.

މިއީ މެޓް ޑޭމަން އާއި އޭން ހަތަވޭގެ އިތުރުން ރޮބަޓް ޕެޓިންސަން އާއި ޓޮމް ހޮލަންޑްގެ ކެރިއަރުގައި ވެސް މިހާތަނަށް އެންމެ ބޮޑު އާމްދަނީއެއް ހޯދި ފިލްމެވެ.