އިންޑިއާގެ ޓީވީ ރިއަލިޓީ ޝޯތަކުގެ ތާރީހުގައި އެންމެ ބޮޑު ސަޕޯޓެއް ހޯދާފައިވާ "ބިގް ބޮސް"ގެ 20 ވަނަ ސީޒަން ފެށުމުގެ ތައްޔާރީތައް ވަރަށް ބާރަށް ކުރިއަށް އެބަދެ އެވެ.

ގިނަ ބަޔަކު ކުރަމުންދިޔަ އިންތިޒާރަށް ނިމުމެއް ގެނެސްދެމުން މިފަހަރުގެ ސީޒަން ސެޕްޓެމްބަރު 21 ގައި ފެށުމަށް މިހާރު ވަނީ ތާވަލު ކުރެވިފަ އެވެ.

މި ސީޒަނުގެ އެންމެ އުފާވެރި އެއް ހަބަރަކީ ޝޯގެ މަގުބޫލު ކަމުގެ އަސްލު ކަމަށްވާ ސުޕަސްޓާރު ސަލްމާން ޚާން ހޯސްޓެއްގެ ގޮތުގައި އަނެއްކާވެ ސް ފެނިގެން ދާނެކަން ޔަގީން ވުމެވެ.

ޝޯ އުފައްދާ އެންޑެމޯލް ޝައިން އާއި ކަލާޒް ޓީވީ އިން މިހާރު ވަނީ ބިގް ބޮސްގެ ގެއަށް ވަންނާނެ ބައިވެރިން ޝޯޓްލިސްޓް ކުރުމުގެ ފަހުގެ މަރުހަލާ ފަށާފަ އެވެ. ބޮލީވުޑްގެ ރިޕޯޓްތައް ބުނާ ގޮތުން މިފަހަރުގެ ސީޒަނުން ޓީވީ ދާއިރާގެ މަޝްހޫރު ތަރިންގެ އިތުރުން، ސޯޝަލް މީޑިއާގެ ނުފޫޒުގަދަ އިންފްލުއެންސަރުންނާއި ބައެއް މިއުޒީޝަނުން ވެސް ފެނުމުގެ ފުރުސަތު ބޮޑެވެ.

20 ވަނަ ސީޒަނަކީ ބިގް ބޮސް ފްރެންޗައިޒްގެ ބޮޑު މައިލްސްޓޯންއަކަށް ވާތީ، މިއީ މިހާތަނަށް ފެންނާނެ އެންމެ ހާއްސަ އަދި ޑްރާމާ ބޮޑު ސީޒަނަކަށް ހެދުމަށް ޕްރޮޑިއުސަރުން އަންނަނީ ރާވަމުންނެވެ.

މީގެ ކުރިން ބައެއް ސީޒަންތަކުގެ ހޯސްޓިންގްއާ ސަލްމާން ދުރުވެދާނެ ކަމަށް އަޑުތައް ފެތުރުނު ނަމަވެސް، ބިގް ބޮސްގެ ފޭނުންނަށް ސަލްމާން ނޫން މީހަކު އެ މަގާމުން ފެނުމަކީ ބަލައިގަންނަން ފަސޭހަ ކަމެއް ނޫނެވެ.

ޝޯގެ އޮފިޝަލުން ހާމަކުރި ގޮތުގައި ސަލްމާން ޚާނަކީ ބިގް ބޮސްގެ މޫނެވެ. އޭނާގެ 'ވީކެންޑް ކާ ވާރް' އެޕިސޯޑުތަކަކީ ޝޯގެ ޓީއާރްޕީ އެންމެ މައްޗަށްދާ ވަގުތެވެ. އެހެން ކަމުން 20 ވަނަ ސީޒަންގެ އެގްރީމެންޓް މިހާރު ވަނީ ފައިނަލް ކުރެވިފައި ކަމަށް އެ ފަރާތްތަކުން ބުނެ އެވެ.

ސަލްމާން އޭނާގެ ކުރިއަށް އޮތް ފިލްމީ ޕްރޮޖެކްޓްތަކުގެ މަސައްކަތްތަކާ އެކުވެސް، ބިގް ބޮސްއަށް ހާއްސަ ވަގުތުތަކެއް ދިނުމަށް ވަނީ އެއްބަސްވެފަ އެވެ.

ކޮންމެ އަހަރަކުވެސް ބިގް ބޮސްގެ ގެ ފަރުމާ ކުރަނީ ތަފާތު ތީމްއަކަށެވެ. މީގެ ކުރިން "ޖަންގަލި ތީމް"، "ހެވަން އެންޑް ހެލް" އަދި "ޓައިމް މެޝިން" ފަދަ ތީމްތައް ފެނިގެން ގޮސްފައިވާއިރު، މިފަހަރުގެ 20 ވަނަ ސީޒަނަށް ފަރުމާކުރާ ގޭގެ ތީމް ވަނީ ވަރަށް ސިއްރު ކޮށްފަ އެވެ. އެހެން ނަމަވެސް، ބައެއް ރިޕޯޓްތައް ބުނާގޮތުން މިއީ "ފިއުޗަރިސްޓިކް" ނުވަތަ "ރޯޔަލް" ތީމްއަކަށް ވުން ގާތެވެ.

ސެޕްޓެމްބަރު މަހުގެ މެދުތެރޭގައި ޝޯގެ ރަސްމީ ޕްރޮމޯތައް ޓީވީން ދައްކަން ފަށާނެ އެވެ. ބިގް ބޮސްގެ ފޯރިގަދަ ޒުވާބުތަކާއި، ރޭވުންތަކާއި، އަދި ސަލްމާންގެ ހޫނު ހުށަހެޅުންތަކަށް އިންތިޒާރުކުރާ ފޭނުންނަށް މިއީ ހަމަ ގައިމުވެސް އުފާވެރި މަހަކަށް ވެގެންދާނެ އެވެ.