ސަރުކާރުގެ ޓެކްސީ ލައިންގެ ހިދުމަތް މި މަހުގެ 18 ވަނަ ދުވަހު ފެށުމަށް ތައްޔާރުވަމުންދާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު އިއުލާނު ކުރައްވައިފި އެވެ.

ނޫސްވެރިންނަށް މައުލޫމާތު ދެއްވަމުން މިނިސްޓަރު އަމީން ވިދާޅުވީ، އަމާޒަކީ މި މަހުގެ 18 ވަނަ ދުވަހު މި ހިދުމަތް ރަސްމީކޮށް ފެށުން ކަމަށެވެ. މި މަހުގެ 18 ވަނަ ދުވަހަކީ ފިތުރު އީދު ދުވަހެވެ.

މިނިސްޓަރު އަމީން ވިދާޅުވި ގޮތުގައި، އީދު ދުވަހު ހިދުމަތް ފަށާއިރު ފުރަތަމަ ފަށާނީ ލިމިޓެޑް ނުވަތަ ވަކި މިންވަރެއްގެ ހިދުމަތްތަކަކާ އެކުގަ އެވެ. ނަމަވެސް، ކުރިއަށް އޮތް ތަނުގައި މި ހިދުމަތް އިތުރަށް ފުޅާކޮށް ތަރައްގީ ކުރުމުގެ މަސައްކަތް ކުރިއަށްދާނެ ކަމުގެ ޔަގީންކަން މިނިސްޓަރު ވަނީ ދެއްވާފަ އެވެ.

"އަޅުގަނޑުމެން މި ބަލަނީ މިހާރު މިއޮތް ތާވަލާއި އެއްގޮތަށް މިކަން ކުރެވޭތޯ," މިނިސްޓަރު ވިދާޅުވި އެވެ.

150 ކާރު ދެ ބެޗަކަށް ބަހާލައިގެން ގެންނަނީމި ހިދުމަތަށް ބޭނުންވާ 150 ކާރު ރާއްޖެ ގެނައުމަށް ވަނީ ނިންމާފަ އެވެ. މިނިސްޓަރު ވިދާޅުވި ގޮތުގައި ކާރުތައް ގެންނާނީ ދެ ބުރެއްގެ މަތިންނެވެ. ފުރަތަމަ ބެޗުގެ ކާރުތައް މިހާރު ރާއްޖެ ގެނައުމުގެ މަސައްކަތް ދަނީ ކުރަމުންނެވެ. އެގޮތުން، އެމްޓީސީސީއާ ހަވާލާދީ މިނިސްޓަރު ވިދާޅުވީ މިއަދުގެ ވަގުތެއްގައި ކާރުތައް ލަންކާ ޕޯޓަށް ގެނެވޭނެ ކަމަށާއި، މި މަހުގެ 11 ވަނަ ދުވަހު އެ ކާރުތައް ރާއްޖެއަށް ވާސިލުވާނެ ކަމަށެވެ.

ގެންނަ ކާރުތަކުގެ ތަފްސީލު ހިއްސާ ކުރައްވަމުން މިނިސްޓަރު ވިދާޅުވީ، ޖުމްލަ ތިން މޮޑެލްއެއްގެ ކާރު މި ހިދުމަތުގައި ބޭނުން ކުރާނެ ކަމަށެވެ. މީގެ ތެރެއިން ދެ މޮޑެލްއެއް އުފައްދަނީ ޗައިނާގައެވެ. އަދި އަނެއް މޮޑެލް އަކީ ތައިލެންޑުން އުފައްދާ ކާރުތަކެކެވެ. ދެވަނަ ބެޗުގެ ކާރުތައް ލިބޭނެ ތާރީހެއް އަންނަ ހުކުރު ދުވަހު ކަށަވަރުވާނެ ކަމަށްވެސް އަމީން ވިދާޅުވި އެވެ.

ހިދުމަތް ލަސްވީ ކާރުތަކަށް ގެނައި ބަދަލުތަކުގެ ސަބަބުންކުރިން ކަނޑައެޅި ތާރީހަށް ހިދުމަތް ނުފެށި ލަސްވީ ކާރުތަކަށް ބައެއް ފަންނީ ބަދަލުތައް ގެންނަން ޖެހުމުން ކަމަށް މިނިސްޓަރު ފާހަގަކުރެއްވި އެވެ.

މި ބަދަލުތަކަކީ ރާއްޖެއަކީ މޫދާ ކައިރި ގައުމަކަށް ވެފައި، ލޮނުގެ އަސަރު ކާރުތަކަށް ކުރާނެތީ އެކަމުން ރައްކާތެރިވުމަށް ގެނައި ބަދަލުތަކެކެވެ. މިހާރު އެ ބަދަލުތައް ގެނެސް ނިމިފައިވާތީ، ދެން އިތުރު ލަސްވުމެއް ނެތި ހިދުމަތް ފެށޭނެ ކަމަށް މިނިސްޓަރު އުންމީދު ކުރައްވަ އެވެ.

ސަރުކާރުގެ ޓެކްސީ ލައިން ހިންގުމުގެ މަސްއޫލިއްޔަތު ހަވާލުކޮށްފައިވަނީ އެމްޓީސީސީއާއެވެ. އެ ކުންފުނިން މިހާރު ވަނީ ހިދުމަތަށް ބޭނުންވާ ޑްރައިވަރުން ހޯދައި، އޮޕަރޭޝަން ފެށުމަށް ވާންޖެހޭ އެންމެހާ ތައްޔާރީތައް ފުރިހަމަކޮށްފަ އެވެ.