އުމްރާއަށް ގެންގޮސްދޭނެ ކަމަށް ބުނެ ކޮންމެ އަހަރަކުވެސް އެތައް ބަޔަކަށް ލަނޑު ދެމުންދާތީ އެކަން ހުއްޓުވުމަށް ހައްޖާއި އުމްރާއަށް ހާއްސަ ގާނޫނެއް އެކުލަވާލުމުގެ މަސައްކަތް ކުރަމުންދާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް ވިދާޅުވެއްޖެ އެވެ.

ސްކޭމްތައް މަދުކުރުމަށް އެހެން ދުނިޔޭގެ އެހެން ގައުމުތަކުގައި ވެސް ހައްޖާއި އުމްރާއަށް ހާއްސަ ގާނޫނެއްތަކެއް ހަދާފަ އޮވެ އެވެ. އެގޮތުން މިފަދަ އެންމެ ވަރުގަދަ ގާނޫނެއް ހަދާ، އެ އަދަބު ކަނޑައަޅާފައިއޮންނަނީ ސައުދީ އަރަބިއްޔާގަ އެވެ. މިފަދަ ގާނޫނުތައް ހެދުމުން ސްކޭމްގެ މައްސަލަތަށް ކުރިމަތި ވުން ބޮޑުތަނުން މަދުވާކަމަށް އެ ގަވައިދަށް އަމަލުކުރަމުން ގެންދާ ގައުމުތަކުން ބުނެ އެވެ.

މިނިސްޓަރ ޝަހީމް ވިދާޅުވީ ސްކޭމްތައް މަދުކުރުމަށް އެހެން ގައުމުތަކުގައި ވެސް އޮންނަ ގޮތަށް ރާއްޖޭގައި ހައްޖާއި އުމްރާއަށް ހާއްސަ ގާނޫނެއް އައުމުން އެފަދަ އަމަލުތައް ހިންގާ މީހުންނަށް ހަރުކަށި އަދަބުތައް ގާނުނުގެ ދަށުން ކަނޑައެޅިގެންދާނެ ކަމަށެވެ.

މިހާރު އަމަލުކުރަމުންދާ އުމްރާއާ ބެހޭ އުސޫލުގެ ދަށުން ކޮންމެ ކުންފުންޏަކަށް ވެސް އުމްރާއަށް މީހުން ގެންދެވޭއިރު، އެއްވެސް ފައިނޭންޝަލް ގެރެންޓީއެއް ދޭން ނުޖެހެ އެވެ.

އެކަމާ ގުޅޭގޮތުން ޝަހީމް ވިދާޅުވީ އެކުލަވާލާ ގާނޫނުގެ ދަށުން އުމްރާއަށް މީހުން ގެންދަން ފައިނޭންޝަލް ގެރެންޓީއެއް ދޭން ޖެހޭ ގޮތަށް ކަންކަން ބައްޓަން ކުރުމުގެ ވިސްނުން ގެންގުޅުއްވާ ކަމަށެވެ.

ޝަހީމް ވިދާޅުވީ އުމްރާއާ ބެހޭ އުސޫލުތައް ހެދިފައި އޮންނަ ގޮތުން ކޮންމެ ކުންފުންޏަކަށް ވެސް މީހުން ގެންދެވޭ ގޮތަށް ކުރީއްސުރެވެސް ހެދިފައި އޮންނަ ކަމަށާއި، ނަމަވެސް އެކަމުގައި ފައިނޭންޝަލް ވަކި ގެރެންޓީއެއް ބަހައްޓާ ގޮތަށް ނޯންނަ ކަމަށެވެ.

އެހެން ނަމަވެސް މިހާރު ކަންތައް ދިމާވަމުންދާ ގޮތުން ފައިނޭންޝަލް ގެރެންޓީ ބަހައްޓަން ގޮތްތަކެއް ރާވަން ވިސްނަމުން ގެންދާ ކަމަށް މިނިސްޓަރު ވިދާޅުވި އެވެ.

ޝަހީމް ވިދާޅުވީ ރާއްޖޭގައި އުމްރާއަށް މީހުން ގެންދާ ރަނގަޅު ގްރޫޕްތައް ވެސް އުޅޭ ކަމަށާއި ނަމަވެސް މިނިސްޓްރު ވިދާޅުވީ ރައްޔިތުންގެ އިތުބާރު އޮންނަ ގޮތަށް އެކަން ކުރަން ޖެހޭ ކަމަށެވެ.

މިގޮތުން ރައީސް މުހައްމަދު މުއިއްޒުއާ މަޝްވަރާ ކުރައްވައިގެން ވީހާވެސް އަވަހަށް ހައްޖާއި އުމްރާއާ ބެހޭ ގާނޫނު ވުޖޫދު ކުރުމުގެ މަސައްކަތް ކުރައްވާނެ ކަމަށް ޝަހީމް ވިދާޅުވި އެވެ.

ރާއްޖޭގައި ފަހަކަށް އައިސް ކޮންމެ އަހަރަކު ކަހަލަ ގޮތަކަށް އުމްރާގެ އަޅުކަން އަދާކުރަން ގެންދާނެ ކަމަށް ބުނެ އެކި ގްރޫޕްތަކުން މީހުންގެ އަތުން ފައިސާ ނަގައިގެން އޮޅުވާލާ މައްސަލަ އަންނަނީ ބޮޑުވަމުންނެވެ.