ގިނަ ބައެއްގެ ސަމާލުކަން ހުއްޓުނު ބޮލީވުޑްގެ ޖޯޑް މަލައިކާ އަރޯރާ އާއި އަރުޖުން ކަޕޫރުގެ ގުޅުމާއި ގުޅޭގޮތުން ދުވަސްތަކަކަށް ފަހު މަލައިކާ ވާހަކަ ދައްކާއިފި އެވެ.

ހަ އަހަރު ދުވަހު ލޯބީގެ ގޮތުން ގުޅިގެން އުޅުމަށްފަހު، މިހާރު ވަކިވެފައިވާ އަރުޖުންއަކީ މަލައިކާގެ ދިރިއުޅުމުގައި ވަރަށް ހާއްސަ މީހެއް ކަމަށް އިންޑިއާގެ ނޫހަކަށް ދިން އިންޓަވިއުއެއްގައި މަލައިކާ ވަނީ ބުނެފަ އެވެ.

މަލައިކާގެ ދިރިއުޅުމާ ގުޅޭގޮތުން ކުރި ސުވާލުތަކަކަށް ޖަވާބު ދެމުން އޭނާ ބުނީ ކޮންމެ މީހެއްގެ ދިރިއުޅުމުގައި ވެސް އުފަލާއި، ރުޅި އަދި ހިތާމައިގެ ދުވަސްތައް ދާނެ ކަމަށާއި އޭނާވެސް އެ ދުވަސްތައް ތަހަންމަލުކުރި ކަމަށެވެ. އެގޮތުން ދިރިއުޅުމުގައި އަރުޖުން ކަޕޫރަކީ ވަރަށް ހާއްސަ މީހެއް ކަމަށް އޭނާ ބުންޏެވެ. އަދި އޭނާގެ ދިރިއުޅުމުގައި ދިމާވި ގިނަ ކަންކަމުގައި އަރުޖުން އެހީތެރިވި ކަމަށް ބުނެފައިވެ އެވެ.

ނަމަވެސް މިހާރު އެ ވާހަކަތައް ދައްކަން ބޭނުން ނުވާ ކަމަށް މަލައިކާ ބުންޏެވެ.

މަލައިކާ އާއި އަރުޖުން ފާހަގަކުރެވުނީ އުމުރުގެ ބޮޑު ތަފާތެއް ހުރި ޖޯޑެއްގެ ގޮތުގަ އެވެ. އެގޮތުން މަލައިކާ މިހާރު އުމުރުން 50 އަށް ވުރެން މަތިވެފައިވާއިރު، އަރުޖުންގެ އުމުރު އުޅެނީ ތިރީހުގަ އެވެ.

މަލައިކާ ކުރިން ކައިވެނިކޮށްގެން އުޅުނީ ބޮލީވުޑްގެ ފިލްމީ އާއިލާއެއް ކަމަށްވާ ސަލްމާން ހާންގެ ބޭބެ އަރުބާޒު ހާން އާ އެވެ. އެ ދެމީހުންގެ ކައިވެނި ރޫޅި ގިނަ ދުވަސްތަކެއް ވެފައިވާއިރު، އަރުބާޒު އެހެން ކައިވެންޏެއް ކޮށް ދާދިފަހުން ވަނީ ދަރިއަކު ވެސް ލިބިފަ އެވެ.