ކުދި މަތިންދާބޯޓު ޖެއްސޭ ގޮތް ހަދައި، ރާއްޖޭގެ ދެކުނުގެ ހަތަރު އަތޮޅު ވައިގެ މަގުން ގުޅާލައި އަންނަ މަހު ދަތުރުތައް ފަށަން ނިންމައިފި އެވެ.

މޯލްޑިވިއަނުން ބުނިގޮތުގައި ދެކުނުގެ ހަތަރު އަތޮޅު ކަމަށްވާ ގއ އަތޮޅު، ގދ އަތޮޅު، ފުވައްމުލަކާއި އައްޑުއަށް އެ އެއާލައިންގެ ދަތުރުތަކުން ވަނީ ގުޅާލާފަ އެވެ.

ދެކުނުގެ ހަތަރު އަތޮޅު ރަސްމީކޮށް ގުޅާލުން އިފްތިތާހުކުރީ ގަން އެއާޕޯޓުގައި މިއަދު ހަވީރު ބޭއްވި ރަސްމިއްޔާތެއްގަ އެވެ. މި ރަސްމިއްޔާތުގައި ޓްރާންސްޕޯޓު މިނިސްޓަރު މުހައްމަދު އަމީންގެ އިތުރުން ބައެއް މިނިސްޓަރުންނާއި ސަރުކާރުގެ އިސްވެރިން ބައިވެރިވެވަޑައިގެންނެވި އެވެ.

އެ ރަސްމިއްޔާތުގައި މި ދަތުރުތައް ފެށުމުގެ ހުއްދަ މޯލްޑިވިއަންއާ ހަވާލުކޮށްދެއްވީ ޓްރާންސްޕޯޓު މިނިސްޓަރު އަމީނެވެ. މޯލްޑިވިއަންގެ ފަރާތުން އެ ހުއްދައާ ހަވާލުވެވަޑައިގެންނެވީ އެ ކުންފުނީގެ މެނޭޖިން ޑިރެކްޓަރު އިބްރާހިމް އިޔާސް އެވެ.

ހަތަރު އަތޮޅުގެ މެދުގައި މި ދަތުރުތައް ކުރުމަށް ހަމަޖެހިފައިވަނީ މޯލްޑިވިއަންގެ ކުދި ބޯޓުތައް، އެއްގަމު ރަންވޭތަކަށް ޖެއްސޭހެން ހެދުމަށް ފަހު އެވެ.

ރަސްމިއްޔާތުގައި ވާހަކަދައްކަވަމުން އައިލެންޑް އޭވިއޭޝަންގެ މެނޭޖިން ޑިރެކްޓަރު އިޔާސް ވިދާޅުވީ، މި ޚިދުމަތުގެ ސަބަބުން ދެކުނުގެ ރައްޔިތުންނަށް ވަރަށް ބޮޑު ލުޔެއް ލިބޭނެ ކަމަށެވެ. އެ ގޮތުން، ހަފުތާގެ ކޮންމެ ދުވަހަކު ވެސް މި ދަތުރުތައް ކުރާނެ ކަމަށް އޭނާ ވިދާޅުވި އެވެ.

މިއީ ދަތުރުފަތުރުކުރުމަށް ލިބޭ ވަރަށް ބޮޑު ކުރިއެރުމެއްކަން ފާހަގަކުރައްވައި އިޔާސް ވިދާޅުވީ، މިކަމުގެ ސަބަބުން މި އަތޮޅުތަކުގެ ރައްޔިތުންގެ ގުޅުން ބަދަހިވެ، އިޖުތިމާއީ އަދި އިގުތިސާދީ ކުރިއެރުންތަކެއް ލިބޭނެ ކަމަށެވެ.

މީގެ އިތުރުން، މި ޚިދުމަތުގެ ސަބަބުން ދެކުނުގެ ފަތުރުވެރިކަމަށް ވެސް ހެޔޮ އަސަރުކުރާނެ ކަމަށް އިޔާސް ވިދާޅުވި އެވެ.

ދެކުނުގެ ހަތަރު އަތޮޅުތަކަށް ދަތުރުކުރާ އަގުތައް:

  • ގަން - ފުވައްމުލަކު: ކޮޅަކަށް 500 ރުފިޔާ
  • ގަން - ކާޑެއްދޫ: ކޮޅަކަށް 900 ރުފިޔާ
  • ގަން - ކޫއްޑޫ: ކޮޅަކަށް 900 ރުފިޔާ
  • ފުވައްމުލަކު - ކާޑެއްދޫ: ކޮޅަކަށް 650 ރުފިޔާ
  • ފުވައްމުލަކު - ކޫއްޑޫ: ކޮޅަކަށް 650 ރުފިޔާ

މިހާރު އެ ދަތުރުތަކުގެ ބުކިންއަށް ހުޅުވާލާފައިވާއިރު، މި ހިދުމަތަށް ބޭނުންކުރާނީ ޑީއެޗްސީ-6-300 ޓްވިން އޮޓާ ބޯޓެވެ. މި ބޯޓުތަކުގައި ގާތްގަނޑަކަށް 15 ވަރަކަށް މީހުންނަށް ދަތުރުކުރެވޭނެ އެވެ. މި ހިދުމަތުގެ ބޭނުމަކީ ދެކުނުގެ އަތޮޅުތައް ގުޅާލައި، ސަރަހައްދީ ދަތުރުފަތުރު ހަރުދަނާކުރުމެވެ.