ރާއްޖޭގައި ގާއިމްކުރާ އިގްތިސޯދީ ހާއްސަ ސަރަހައްދު ނުވަތަ ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ ދަށުން ތަރައްގީ ކުރާ ފުރަތަމަ ޓައުންޝިޕް މަޝްރޫއު، 'އައިލާ ސަސްޓެއިނަބަލް ޓައުންޝިޕް' މަޝްރޫއުގެ ބިންގާ އަޅައި އަމަލީ މަސައްކަތް މިއަދު ފަށައިފި އެވެ.

ނ. ދިގުފަރު ފަޅާއި ދެކުނުފަރު އަދި ކުރަމާދޫގައި ތަރައްގީ ކުރާ މި ޓައުންޝިޕް މަޝްރޫއުގެ ބިންގާއެޅުމަށް މިއަދު އެ ސަރަހައްދުގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ރައީސް މުހައްމަދު މުއިއްޒެވެ.

މިއީ 790 މިލިއަން ޑޮލަރުގެ މަޝްރޫއެކެވެ. ޕްރޮޖެކްޓު އައިލާއާ މަޝްރޫއުގެ އިންވެސްޓުމެންޓު އެއްބަސްވުމުގައި، މަޝްރޫއު ކުރިއަށް ގެންދާ ކްރިސްޓަލް ހޯލްޑިންސްއާ އެކު މިދިޔަ ޑިސެމްބަރު 31 ވަނަ ދުވަހު ވަނީ ސޮއިކޮށްފަ އެވެ.

ތަރައްގީ ކުރާ ޓައުންޝިޕްގައި މަތީ ފަންތީގެ ހޮސްޕިޓަލިޓީ އަދި ރެޒިޑެންޝަލް ބައިތަކާއި އިގްތިސޯދީ އަދި އިޖުތިމާއީ ދާއިރާއާ ގުޅުންހުރި ވަސީލަތްތައް ހިމެނެ އެވެ.

މީގެއިތުރުން ރާއްޖޭގައި މެޑިކަލް ޓޫރިޒަމް ކުރިއެރުވުމަށް ކުރާ މަސައްކަތުގެ ދަށުން ތަރައްގީ ކުރާ އެންމެ ފަހުގެ ސިއްހީ ހިދުމަތްދޭ ހޮސްޕިޓަލަކާއި ބައިނަލްއަގުވާމީ މިންގަނޑުތަކާ އެއްގޮތަށް ކިޔަވައިދޭނެ ސްކޫލެއް ވެސް ގާއިމްކުރާނެ އެވެ.

މި ޓައުންޝިޕް ތަރައްގީކުރާނީ %60 އިއާދަކުރަނިވި ހަކަތައިން ހިންގާ ގޮތަށެވެ.

ޓައުންޝިޕްގެ މަސައްކަތް ފެށޭނެކަމަށް ލަފާކުރެވެނީ 2028 ވަނަ އަހަރު އެވެ.

މިނިސްޓްރީން ބުނީ އެތަން ތަރައްގީވުމާއެކު އިގްތިސޯދީ އާ ދިރުމެއް އައިސް، ވަޒީފާގެ އާ ފުރުސަތުތައް ފަހިވެ، ތަރައްގީގެ ދުވެލި އަވަސްވާނެ ކަމަށެވެ.