ރާއްޖެ އާއި އިންޑިއާގެ ރައްޔިތުންގެ މަންފާއަށްޓަކައި އެކުގައި ކުރިއަށްގެންދާ މަސައްކަތްތައް ކުރިއަށްދާނެ ކަމަށް ބޮޑުވަޒީރު ނަރެންދުރަ މޯދީ ވިދާޅުވެއްޖެ އެވެ.

އެކްސްގައި ދިވެހި ބަހުން ކުރެއްވި ޕޯސްޓެއްގައި މޯދީ ވިދާޅުވީ އެ ގައުމުގެ ޖުމްހޫރީ ދުވަހުގެ މުނާސަބަތުގައި އަރިސްކުރެއްވި ތަޙުނިޔާއާއި ހެޔޮއެދުން އިހުތިރާމާ އެކު ބަލައިގަންނަވާ ކަމަށެވެ.

އަދި ދެ ގައުމުގެ ރައްޔިތުންގެ މަންފާއަށްޓަކައި އެކުގައި ކުރާ މަސައްކަތް ކުރިއަށްގެންދަވާނެ ކަމަށް މޯދީ ވިދާޅުވި އެވެ.

ރައީސް މުއިއްޒު އިންޑިއާގެ ބޮޑުވަޒީރު މޯދީއަށް ފޮނުއްވި ސިޓީފުޅުގައި ވަނީ ދެ ގައުމުގެ ގުޅުމުގެ ނަތީޖާއެއްގެ ގޮތުން ފެންނާން ހުރި ތަރައްގީ ފާހަގަކުރައްވާފައެވެ. އަދި، ބޮޑުވަޒީރު މޯދީގެ ބެއްލެވުމުގެ ދަށުން ސަރަޙައްދީ ފެންވަރުގައި އިންޑިއާއިން ދައްކާ އިސްނެގުން ފާހަގަކުރައްވައި، ކުރިއަށް އޮތް ދުވަސްތަކުގައި ވެސް ދެ ގައުމުން މަސްލަހަތު ހިމެނޭ ކަންކަމުގައި ދެ ގައުމުގެ ގުޅުން ހަރުދަނާކޮށް، އަމަލީގޮތުން އެއްބާރުލުން ދިނުން އިތުރުކުރުމުގެ އަޒުމުގައި ސަރުކާރުން މަސައްކަތްކުރާނެ ކަމަށް ރައީސް ވިދާޅުވި އެވެ.

ރާއްޖޭގެ އިގުތިސާދީ އަދި އިޖުތިމާއީ ތަރައްގީއަށް އިންޑިއާއިން ދޭ އެއްބާރުލުމުގެ އަގުވަޒަންކުރައްވާ ކަމަށް އެމަނިކުފާނު ވިދާޅުވިއެވެ.