އެމަނިކުފާނު ޖަލަށް ލައިގެން ގެންގުޅެނީ ޕީޕީއެމްގެ ފިކުރު ބަލިކޮށްލެވިދާނެ ކަމަށް ދެކިގެން ކަމަށާއި ނަމަވެސް ބޭއިންސާފުގެ ކުރިމަރީގައި ކުޑަކަކޫ ނުޖަހާނެ ކަމަށް ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.

އަންނަ ހޮނިހިރު ދުވަހު ބާއްވާ ލޯކަލް ކައުންސިލް އިންތިޚާބާ ދިމާކޮށް ދަރިކަލުން ޒެއިން އަބްދުﷲ ޔާމީން މެދުވެރިކޮށް ފޮނުއްވި ސިޓީއެއްގައި އެމަނިކުފާނު ވިދާޅުވީ އަމިއްލަ ހިތްހަމަޖެހުމަށްވުރެ އެމަނިކުފާނަށް މުހިންމީ ދިވެހި ރައްޔިތުންގެ މިނިވަންކަމާއި މި ގައުމުގެ އިސްތިގުލާލު ކަމަށެވެ.

އެމަނިކުފާނު ވިދާޅުވީ ޕީޕީއެމް ޕީއެންސީ ފިކުރުގެ ލޭ ހިނގާހާ ހިނދަކު މިގައުމަށް ވާނެ އެއްޗެއްވާން ދޫކޮށްނުލާނެކަން ޔަގީންވާ ކަމަށެވެ.

ރައީސް ޔާމީން ވިދާޅުވީ 2013 ވަނަ އަހަރު ރާއްޖޭގެ ވެރިކަމާ ހަވާލުވެ، ހައްލު ނުކުރެވޭނެ ކަމަށް ގިނަބަޔަކު ގަބޫލުކޮށްގެން ތިބި ގައުމީ މަސްލަހަތާ ގުޅުން ހުރި މައްސަލަތައް ހައްލުކޮށްދެއްވާފައިވާނެ ކަމަށެވެ. ހަމައެހެންމެ ފުރިހަމަ ސިޔާދަތާއި މިނިވަންކަން އޮތް ފަޚްރުވެރި ގައުމަކަށް މި ރާއްޖެ ހަދައިދީފައިވާނެ ކަމަށް ވެސް އެމަނިކުފާނު ވިދާޅުވި އެވެ.

އެމަނިކުފާނު ޖަލަށް ލާފައި ވަނީ ބޭރުގެ ބަޔަކާ ގުޅިގެން ކަމަށާއި ބޭރުގެ ބޮޑެތި ނުފޫޒުތަކުގެ އަޅުވެތިކުރުމުގެ ފަަލްސަފާއާ ދެކޮޅުވާން ޖެހޭ ކަމަށެވެ.

"މިކަންކަމުގެ ނަތީޖާއަކަށްވީ ވާދަވެރި ސިޔާސީ ފަރާތްތަކާއި އެ ބޭފުޅުންނަށް ވާގިވެރިވާ ބޭރުގެ ފަރާތްތައް ގުޅިގެން އަޅުގަނޑު ޖަލަށްލުމެވެ." ރައީސް ޔާމީން ވިދާޅުވި އެވެ.

ޤައުމީ އަދި ވަތަނީ ރުކުންތަކުގައި ސާބިތުކަމާއެކު ތިއްބަވައި، ޕީޕިއެމް، ޕިއެންސީ "ބަދަހި ލަޝްކަރު" ކުރިއަށް ދިޔުމަށް ރައީސް ޔާމީން އެދިވަޑައިގަތެވެ.

ރައީސް ޔާމީން ވިދާޅުވީ ޖަލުގައި ހުންނަވަން ޖެހިވަޑައިގަތުމަކީ ޤައުމަށް ތަރައްގީ ހޯދައިދެއްވުމަށް ފެއްޓެވި މަސައްކަތުގެ ނިމުމެއް ނޫން ކަމަށާއި އެ ދަތުރު އަދިވެސް ކުރިއަށް ދާނެ ކަމުގެ ޔަގީންކަން އަރުވާ ކަމަށެވެ.

"މާތްﷲގެ ވާގިފުޅާއެކު އެ ދަތުރު އަލުން ފަށައި އުފާވެރި ހަޔާތެއްގެ ދަންމަރު އަލުން ރޯކޮށް، ނަފާވެރިކަން މި ޖީލަށް އަލުން ގެނެސްދޭނީ މި ފިކުރުންނެވެ. ހުރިހާ ބޭފުޅުންނެވެސް ހިތްވަރުކުރައްވާ ގަދައަޅައި މަސައްކަތްކުރައްވާށެވެ. އަޅުގަނޑުމެން އެނބުރި އަންނާނީ ބަދަހިކޮށެވެ." ސަޕޯޓަރުންނަށް އުންމީދު ދެއްވައި ރައީސް ޔާމީން ވިދާޅުވި އެވެ.

އަންނަ ހޮނިހިރު ދުވަހު ބާއްވާ ކައުންސިލް އިންތިޚާބު ކާމިޔާބުކުރުމަށް ޕީޕީއެމް، ޕީއެންސީގެ މެމްބަރުން ކުރާ ބުރަ މަސައްކަތް ފާހަގަކޮށް އެކަމަށްޓަކައި އެމަނިކުފާނު ޝުކުރު އަދާކުރެއްވިއެވެ.