ކުރީގެ ރައީސް އަބްދުﷲ ޔާމީންގެ މައްޗަށް ކުރެވިފައިވާ ދައުވާތަކަކީ ސިޔާސީ އަނިޔާއެއް ކަމަށް ވިދާޅުވެ، މިއަދުގެ ސަރުކާރުން ވެފައިވާ ވައުދުތަކާ ހިލާފަށް ޢަމަލުކުރަމުންދާ ކަމަށް ކުރީގެ ނައިބު ރައީސް އަދި ރައީސް ޔާމީންގެ އިސް ވަކީލު ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި، ޑރ. ޖަމީލު ވިދާޅުވެފައިވަނީ، ރައީސް ޔާމީންގެ މައްޗަށް ވޭތުވެދިޔަ 5 އަހަރު ކުރެވުނު ދަޢުވާތަކަކީ ބޭއިންސާފު ދައުވާތަކެއް ކަމަށާއި، ރައީސް މުހައްމަދު މުއިއްޒުގެ ވައުދުތަކާ ހިލާފަށް މި ދައުވާތައް ކުރިއަށް ގެންދާނެ ކަމަކަށް ގަބޫލުނުކުރެއްވޭ ކަމަށެވެ.

ޑރ. ޖަމީލް ފާހަގަކުރެއްވި ގޮތުގައި، މިއަދުގެ ޝަރީއަތުގައި ޕްރޮސިކިއުޓާ ޖެނެރަލްގެ އޮފީހުން ވިދާޅުވެފައިވަނީ، މި މައްސަލައިގައި ހިމެނޭ އެއް ފަރާތުގެ މައްސަލަ އަނބުރާ ގެންދިޔައީ "އަންޑިއު ޑިލޭ" އެއް އުފަންވާތީ ކަމަށެވެ.

"ރައީސް ޔާމީނުގެ މައްސަލައަށް ނުވާލަހެއް އެހެން ފަރާތަކަށް ވިތޯ؟" މިހެން ސުވާލު އުފައްދަވައި، ޑރ. ޖަމީލް ވިދާޅުވެފައިވަނީ މިކަމުން އެނގިގެންދަނީ ޕްރޮސިކިއުޝަނުގެ ތައައްސުބު ރައީސް ޔާމީނާމެދު އޮތް މިންވަރު ކަމަށެވެ. އަދި މިއީ އިންސާފު ގާއިމްކުރުމުގެ ނަމުގައި އެކި ސަރުކާރުތަކުން ހިންގަމުންދާ އަނިޔާއެއް ކަމަށާއި، ރައީސް ޔާމީނުގެ ސިޔާސީ މަސައްކަތަށް ބިރުން ބަޔަކު ޝަރުއީ ނިޒާމު ނަހަމަ ގޮތުގައި ބޭނުންކުރާކަމުގެ ހެއްކެއް ކަމަށް ޑރ. ޖަމީލް ވިދާޅުވެފައިވެ އެވެ.

މީގެ އިތުރުން، ޑރ. ޖަމީލް ވަނީ ރައީސް މުއިއްޒުގެ ކެމްޕޭނާއި، ބާރުލިބުމަށްފަހު އޭނާގެ އަމަލުތައް ހުރި ގޮތާމެދު ވެސް ފާޑުވިދާޅުވެފަ އެވެ. ރައީސް ޔާމީންގެ ޕްލެޓްފޯމްގެ ދަށުން ރައީސް މުއިއްޒު ކެމްޕޭން ކުރައްވައި، ރައީސްކަމަށް އިންތިހާބުވުމަށްފަހު، އޭނާގެ ވައުދުތަކާ ޚިލާފުވެ، ރައީސް ޔާމީން އަނެއްކާވެސް ސިޔާސީ ގޮތުން ބަދުނާމުކުރުމަށް މަސައްކަތް ކުރަމުން ކަމަށް ޑރ. ޖަމީލް ތުހުމަތު ކުރައްވާފައިވެ އެވެ.