ރިތޭޝް ދޭޝްމުކްއާއި ޖެނޭލިއާ ޑިސޫޒާއަކީ ބޮލީވުޑްގައި ހަރަކާތްތެރިވާ ޖޯޑުތަކުގެ ތެރެއިން ގިނަ ބައެއްގެ ލޯބި ހޯދާފައިވާ ޖޯޑެކެވެ. އެ ދެމީހުންނަކީ "ކަޕަލް ގޯލްސް"ގެ ގޮތުގައި ވެސް ސިފަކުރެވެ އެވެ.

މީޑިއާއަށް ދިން އިންޓަވިއުއެއްގައި އޭނާއާއި ޖެނޭލިއާގެ އުފާވެރި ކައިވެނީގެ ސިއްރު ހިއްސާ ކުރަމުން ރިތޭޝް ބުނީ ދެމީހުންގެ މެދުގައި ޖެހޭ މައްސަލަތައް ރަނގަޅު ގޮތުގައި ހައްލު ކުރުމަކީ މުހިއްމު ކަމެއް ކަމަށެވެ.

އެގޮތުން ޖެނޭލިއާ ކަމަކާ ހިތްހަމަ ނުޖެެހިފައި ހުރި ނަމަ އެކަމަކާ އަރާރުން ނުވެ އޭނާގެ ވާހަކަ ކަނުލައި އަޑުއަހާ ކަމަށް ރިތޭޝް ބުންޏެވެ.

"އަރާރުން ވުމަކީ އެއްވެސް ކަމެއްގެ ހައްލެއް ކަމަށް އަހަރެން ގަބޫލެއް ނުކުރަން. އެހެންވީމަ ހިތްހަމަ ނުޖެހުންތައް ހައްލު ކުރަނީ ވާހަކަ ދައްކައިގެން" ރިތޭޝް ބުންޏެވެ.

އެކުގައި އުޅޭތާ 22 އަހަރު ދުވަސް ވެފައިވާއިރު މިހާތަނަށް އެއްވެސް އަރާރުމެއް ނުވާ ކަމަށާއި ހިތްހަމަ ނުޖެހުމެއް އޮތްނަމަ އެކަން ޖެހިގެން އަންނަ ދުވަހަށް ނުގެންދާ ކަމަށް ވެސް އޭނާ ބުންޏެވެ.

2003 ވަނަ އަހަރު ނުކުތް ފިލްމު "ތުޖޭ މޭރީ ކަސަމް"ގެ ސެޓުން ބައްދަލުވި އެ ދެމީހުން 10 ވަރަކަށް އަހަރު ރައްޓެހިވެގެން އުޅުމަށްފަހު ކައިވެނިކުރީ 2012 ވަނަ އަހަރު އެވެ. އެ ކައިވެންޏަށް ދެ ކުދިން ވެސް ލިބިފައިވެ އެވެ.