އޯޓިޒަމްއަކީ މިހާރު ދުނިޔޭގައި އެންމެ އާއްމުވަމުން އަންނަ އެއް ބައްޔަށްވާއިރު އެ ބަލީގެ ޝިކާރައަކަށް ގިނައިން ވަނީ ފިރިހެނުންނާއި ފިރިހެން ކުދިން ކަމަށް މާހިރުން ފާހަގަކުރެ އެވެ.
ތަފާސް ހިސާބުތަކުން ދައްކާ ގޮތުގައި އަންހެން ކުދިންނަށްވުރެ ފިރިހެން ކުދިން އޯޓިޒަމް ޓެސްޓުތައް ހަދަން ހުށައެޅުމުގެ ފުރުސަތު 10 ގުނަ ބޮޑެވެ.
އަންހެނުންނަކީ ނަފްސާނީ ބަލިތަކަށް ބޮޑަށް ހުށައެޅިފައިވާ ބައެއް ނަމަވެސް އަންހެން ކުދިންގެ މެދުގައި އޯޓިޒަމް މަދުވަނީ ކީއްވެގެން ކަމާމެދު ސައިންސްވެރިން ވަނީ ސުވާލު އުފައްދާފަ އެވެ.
އެސްޓޮން ބްރެއިން ސެންޓަރުގެ ޕްރޮފެސަރެއް ކަމަށްވާ ރިޕޮން ވިދާޅުވީ އޯޓިޒަމް ގިނައިން ފިރިހެން ކުދިންގެ ކިބައިން ފެންނަނީ އަންހެން ކުދިންނަށް އެ ބަލި ޖެހުން މަދުވުމުން ނޫން ކަމަށާއި އެހެން ނަމަވެސް އެ ބަލި ދެނެގަތުމުގައި މައްސަލަތަކެއް ހުރުމުން ކަމަށެވެ.
އެގޮތުން އޯޓިޒަމްއާ ބެހޭގޮތުން މިހާތަނަށް ކުރެވިފައިވާ ދިރާސާތްކުގައި ގިނައިން ބައިވެރި ވެފައިވަނީ ފިރިހެން ކުދިންކަަން ވެސް އޭނާ ވަނީ ފާހަގަ ކޮށްފަ އެވެ.
އަންހެން ކުދިންގެ މެދުގައި އޯޓިޒަމް ދެނެގަންނަން އުނދަގޫވަނީ ކީއްވެގެންތޯ ސުވާލު ކުރެވުމުން ރިޕޮން ވިދާޅުވީ އެކަމުގެ ފަހަތުގައި އިޖުތިމާއީ ކަންކަމާއި ޖެނެޓިކް ސަބަބުތައް ވެސް ވާ ކަމަށެވެ.
އެގޮތުން ފިރިހެން ކުދިންގެ ފަރާތުން އާދަޔާހިލާފު ކަންކަން ފާހަގަ ކުރެވެމުން އެއީ އޯޓިޒަމްއަށް ޝައްކު ކުރެވި ޓެސްޓުތައް ހެދުން ގާތް ކަމަށް އޭނާ ވިދާޅުވި އެވެ. އެހެން ނަމަވެސް އަންހެން ކުއްޖެއްގެ ފަރާތުން ހަމަ އެކަންކަން ފާހަގަ ކުރެވުމުން އެއީ އޯޓިޒަމްއަށް ޝައްކު ނުކުރެވޭ ކަމަށް ވެސް އޭނާ ފާހަގަކުރި އެވެ.
އެއާއެކު ފިރިހެން ކުދިންނާ ހިލާފަށް އަންހެން ކުދިން އެކުދިންގެ ސިއްހީ ކަންކަން ފޮރުވަން އުޅުމަކީ ވެސް ޅަ އުމުރުގައި އެ ކުދިން އެ ބައްޔަށް "ޑައިގްނޯޒް" ނުކުރެވޭ އެއް ސަބަބެވެ.
ކޮންމެއަކަސް އޯޓިޒަމްއަކީ ދެ ޖިންސުގެ ކުޑަކުދިންނަށް ވެސް އެއްވަރަކަށް ނުރައްކާ އޮތް ބައްޔަކަށް ވާއިރު ޅަ އުމުރުގައި އެ ބަލި ދެނެގަނެ ފަރުވާ ފެށުމަކީ މުހިއްމު ކަމެކެވެ.
