ރާއްޖޭގައި ޓެރަރިޒަމްގެ ހަމަލާއެއް ދީފާނެ ކަމުގެ ބިރު އޮތް ކަމަށް ބުނެ އިނގިރޭސިވިލާތުން ޓްރެވަލް އެޑްވައިޒަރީއެއް ނެރެފި އެވެ.

އިނގިރޭސިވިލާތުގެ ފޮރިން އޮފީހުން މިއަދު އާންމު ކުރި ޓްރެވަލް އެޑްވައިޒަރީގައި ބުނެފައި ވަނީ އެ ގައުމުގެ ރައްޔިތުންނާ ދެކޮޅަށް ހަމަލާ ދިނުމަށް ބައެއް ޓެރަރިސްޓު ޖަމާއަތްތަކުން ގޮވާލާފައިވާ ކަމަށެވެ. އަދި އެފަދަ ހަމަލާއެއް ރާއްޖޭގައި ވެސް ނުދޭނެ ކަމުގެ ޔަގީންކަމެއް ނެތް ކަމަށް އެ އޮފީހުން ބުންޏެވެ.

އިނގިރޭސިވިލާތުގެ ރައްޔިތުންނަށް ހަމަލާދޭން ގޮވާލަނީ ފަލަސްތީނުގައި އިސްރާއީލުން ހިންގާ ގަތުލު އާންމަށް ތާއީދުކޮށް އެ ގައުމުން އިސްރާއީލަށް ހަތިޔާރު ވިއްކާތީ އެވެ.

މިދިޔަ ރޯދަ މަހުގެ ތެރޭގައި މާލޭގައި އެއްޗެއް ގޮއްވާލަން އުޅުނު މައްސަލައަކާ ގުޅިގެން ސިފައިންނާ ފުލުހުން ވަނީ ހާއްސަ އޮޕަރޭޝަނެއް ހިންގާފަ އެވެ. އެ އަޮޕަރޭޝަންގައި ތިން މީހަކު ވަނީ ހައްޔަރުކޮށްފަ އެވެ.

އިނގިރޭސިވިލާތުން އެފަދަ އެޑްވައިޒަރީއެއް ނެރެފައިވާއިރު، ލިވަޕޫލް ފުޓްބޯޅަ ކްލަބާ ގުޅިގެން ރާއްޖެ ޕްރޮމޯޓް ކުރުމުގެ ހަރަކާތެއް ވަނީ ފަށާފަ އެވެ.