މިސްރުގެ ފްރީ ޑައިވަރެއް ރެޑްސީއަށް ފީނައި، 'އެއް ނޭވާގައި ފެނުގެ ދަށުގައި އެންމެ ގިނަ ޕުލްއަޕް' ކުރުމުގެ ގިނިސް ވޯލްޑް ރެކޯޑް ހޯދައިފި އެވެ.

އުމުރުން 36 އަހަރުގެ ރާމީ އަބްދުލްހަމީދު ކިޔާ ފްރީ ޑައިވަރު މި ރެކޯޑް ހޯދީ، 29 ފޫޓާއި 6 އިންޗި ތިރިއަށް ފީނައި، އެއް ނޭވާގައި 33 ޕުލްއަޕް ކޮށްގެނެވެ. މިއީ ފެނުގެ ދަށުގައި އެއް ނޭވާގައި އެންމެ ގިނަ ޕުލްއަޕް ކުރުމުގެ އާ ދުނިޔޭގެ ރެކޯޑެވެ.

މި ކާމިޔާބީއާ ގުޅޭގޮތުން ވާހަކަދައްކަމުން އަބްދުލްހަމީދު ބުނެފައިވަނީ މިއީ ވަރަށް ބޮޑު ގޮންޖެހުމެއް ކަމަށެވެ.

އޭނާ ބުނީ ގިނަ މީހުން ހިތަށްއަރާނީ މިއީ ފަސޭހަ ކަމެއް ކަމަށެވެ. އަދި އެއީ ފެނުގެ ދަށުން މައްޗަށް ދަމަނީ ކަމަށްވާތީ، ފެނުގެ ބޮޔަންސީން އެހީތެރިވާނެތީ ކަމަށް އަބްދުލްހަމީދު ބުނެ އެވެ. ނަމަވެސް އެންމެ ބޮޑު ގޮންޖެހުމަކަށް ވެފައިވަނީ އެ ބޮޔަންސީއާ އެކު އަނެއްކާވެސް ތިރިއަށް ޕުޝްކުރަން ޖެހުން ކަމަށް އޭނާ ބުނެފައިވެ އެވެ.

https://www.youtube.com/watch?v=nRDilCcUNj0&t=2s

މި ރެކޯޑު ހާސިލުކުރުމަށްފަހު އަބްދުލްހަމީދު ބުނެފައި ވަނީ މިއީ ބަޔާންކުރަން ވަރަށް އުނދަގޫ އިހުސާސެއް ކަމަށެވެ.

އޭނާ ބުނީ، މިހާރު އޭނާއަކީ ތާރީޚުގެ ފޮތްތަކުގައި ހިމެނޭ މީހުންގެ ތެރެއިން މީހެއް ކަމަށްވުމަކީ އޭނާގެ ސިކުނޑިއަށް ބަލައިގަންނަން ބޮޑު ކަމެއް ކަމަށް އިހުސާސް ކުރެވޭ ކަމަށެވެ.