ގިނަ ބައެއްގެ މަގުބޫލުކަން ހޯދާފައިވާ ކޭޕޮޕް ބޭންޑް ބީޓީއެސްގެ އެނބުރި އައުމާ ބެހޭގޮތުން އެ ބޭންޑްގެ ބެލެނިވެރި ކުންފުނި ހައިބްއިން ބުނެފި އެވެ.

ހައިބްގެ ސީއީއޯ ލީ ޖެއި ސެންގް ވިދާޅުވީ ބީޓީއެސްގެ އެނބުރި އައުން ގާތްވަމުން އައި ނަމަވެސް އެކަމަށްޓަކައި ސަޕޯޓަރުން އިތުރު އިންތިޒާރެއް ކުރަންޖެހޭނެ ކަމަށެވެ.

އެގޮތުން މިހާރު އަސްކަރީ ހިދުމަތުގައި އުޅޭ މެމްބަރުން އެ ހިދުމަތް ނިންމައި އައުމަށްފަހު ވެސް ބޭންޑްގެ ކަންކަން ހަމައަކަށް އެޅުވުމަށްޓަކައި ވަގުތު ބޭނުންވާނެ ކަމަށް ލީ ވިދާޅުވި އެވެ.

"ބީޓީއެސްގެ ކަންކަމަކީ އަހަރުމެން ވަރަށް ދުރާލާ ރާވައިގެން ކުރާ ކަންކަން. އެހެންވީމަ އެ ބޭންޑުގެ އެނބުރި އައުމުގެ ތައްޔާރީތައް ވެސް ވަނީ ފެށިފައި. އެކަމަކު އެކަމަށް ވަގުތު ނަގާނެ،" އޭނާ ބުންޏެވެ.

ބީޓީއެސްގެ ސުގާ، އާރްއެމް، ޖިމިން، ވީ އަދި ޖަންކުކް އަސްކަރިއްޔާގައި ހިދުމަތް ކުރަމުން އަންނައިރު އެމީހުންގެ ހިދުމަތް ނިމޭނެ ކަމަށް ބެލެވެނީ މިއަހަރުގެ ޖޫން މަހު އެވެ.

2022 ވަނަ އަހަރު ބީޓީއެސް ބޭންޑުން ބްރޭކެއް ނަގަން އުޅޭކަން އިއުލާން ކުރިއިރު އަސްކަރީ ހިދުމަތާ ގުޅުމުގެ ކުރިން ބޭންޑުގެ މެމްބަރުން ވަނީ ސޯލޯ ކެރިއަރުގައި ގިނަ މަސައްކަތްތަކެއް ކޮށްފަ އެވެ.

ބީޓީއެސްއަކީ ރާއްޖެއާއި މުޅި ދުނިޔޭގައި ވެސް ޒުވާނުންގެ ބޮޑު މަގުބޫލުކަމެއް ހޯދާފައިވާ ބޭންޑަކަށް ވާއިރު އެ ބޭންޑުގެ އެނބުރި އައުމަށް ގިނަ ބަޔަކު ދަނީ އިންތިޒާރު ކުރަމުންނެވެ.