ދިރާގުން މިދިޔަ އަހަރު ކުރިއަށް ގެންދިޔަ އެންމެ ބޮޑު ޕްރޮމޯޝަން ކަމަށްވާ "ވިން އަ ސްޕީޑްބޯޓު" ޕްރޮމޯޝަންގައި ލޯންޗް ލިބޭ ނަސީބުވެރިޔާ ހޮވައިފި އެވެ.

ގިނަ ބަޔަކު އިންތިޒާރު ކުރަމުން ދިޔަ މި ލޯންޗް ލިބޭ ނަސީބުވެރިޔަކަށް ހޮވުނީ ހުސައިން ފަޔާޒް، ގއ. ވިލިނގިލި އެވެ.

މި ނަސީބުވެރި ފަރާތް ހޮވައިފައިވަނީ، "ވިން އަ ސްޕީޑްބޯޓް" ޕްރޮމޯޝަންގެ ނަސީބުވެރި ފަރާތް ހޮވުމަށް ރޭ ހުޅުމާލެ ސެންޓްރަލް ޕާކުގައި ބޭއްވި ފޯރިގަދަ މިއުޒިކް ޝޯއެއްގަ އެވެ.

ދިރާގު މޮބައިލް އަދި ފައިބަ ބްރޯޑްބޭންޑް ކަސްޓަމަރުންގެ މެދުގައި ނެގި މި ގުރުއަތުން ހޮވި ކަސްޓަމަރަށް ދިނީ އަލް ޝާލީ މެރިން މަޖެލަން 32 ލޯންޗަކާއި، ޔަމަހާ 175 ހޯސްޕަވަރުގެ ދެ އައުޓްބޯޑް އިންޖީނާއެކު އެވެ.

ދިރާގުން ބުނީ މި ގުރުއަތުގެ މަރުހަލާ އިންސާފުވެރިކަމާއެކު ކުރިއަށް ގެންގޮސް ބެލެހެއްޓުމަށް ތިން ވަނަ ޕާޓީ އޮޑިޓަރެއްގެ ގޮތުގައި ނެކްސާ މޯލްޑިވްސް އައްޔަންކޮށްފައިވާ ކަމަށެވެ. މި ގޮތުން ނެކްސާ މޯލްޑިވްސް އިން ވަނީ ގުރުއަތުގެ މަރުހަލާގެ ހުރިހާ ކަމެއް ގާތުން ބަލައި ގުރުއަތު ނެގި ވަގުތު އެ ތަނުގައި ހަރަކާތްތެރިވެފައިވާ ކަމަށް އެ ކުންފުނިން ބުނެ އެވެ.

"ވިން އަ ސްޕީޑްބޯޓް"ގެ ގުރުއަތު ނެގުމުގެ ބައި ވަނީ ޓީވީއެމް އާއި އެސްއެސްޓީވީ، އަދި ދިރާގު ފޭސްބުކް އާއި ޔޫޓިއުބްއިން ލައިވްކޮށްފަ އެވެ.

"ވިން އަ ސްޕީޑް ބޯޓް" ޕްރޮމޯޝަންގެ ގުރުވަތު ނެގުމަށް ބޭއްވި ޝޯގައި އެކިއެކި ދިވެހި މިއުޒް ފަންނާނުންގެ ފުރިހަމަ ހުށަހެޅުންތައް ވަނީ ފެނިގެން ގޮސްފަ އެވެ. އަދި، މި ޝޯ ކުރިއަށް ދިޔައީ ގިނަ ރަހަތަށް ހިމެނޭ ފުޑް ސްޓޯލްތަކާ އެކީގަ އެވެ.

ދިރާގަކީ އަބަދުވެސް އެ ކުންފުނީގެ ކަސްޓަމަރުންނަށް މި ފަދަ ހާއްސަ އަދި އަގުހުރި ޕްރޮމޯޝަންތައް ކުރިއަށް ގެންގޮސް، ދިރާގުގެ ކަސްޓަމަރުން ޑިޖިޓަލް ރާއްޖޭގައި ކުރިއެރުމަށް އެހީތެރިވަމުންދާ ކުންފުންޏެކެވެ.