ރައީސް މުހައްމަދު މުއިއްޒަށް ވެރިކަން ހޯދައިދިން ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) 12،174 މެންބަރުން ތިއްބައި އިލެކްޝަންސް ކޮމިޝަން (އީސީ) އިން މިއަދު އުވާލައި ސިޔާސީ ޕާޓީގެ ދަފްތަރުން އުނިކޮށްފި އެވެ.

ކުރީގެ ރައީސް މައުމޫން އަބްދުލް ގައްޔޫމް އިސްވެ ހުންނަވައި 2011 ވަނަ އަހަރު އުފެއްދި ޕީޕީއެމްއަކީ ރާއްޖޭގައި 2013 އިން 2018 އަށް ވެރިކަން ކުރި ޕާޓީ އެވެ. އަދި 2023 ވަނަ އަހަރު އެ ޕާޓީގެ ނަން ބޭނުންކޮށްގެން ވެރިކަން ލިބުމުން ރައީސް މުއިއްޒު މިވަނީ އެ ޕާޓީ ފައްތާލައިފަ އެވެ.

ޕީޕީއެމް އުވާލުމަށް އެ ޕާޓީގެ ސެނެޓުން ނިންމީ މިދިޔަ ޑިސެންބަރު މަހުގެ ދެވަނަ ދުވަހު ބޭއްވި ބައްދަލުވުމެއްގަ އެވެ. މިގޮތަށް ނިންމީ ޕީޕީއެމް މިވަގުތު މަސައްކަތް ކުރަމުންދަނީ، ކޯލިޝަނެއްގެ ތެރެއިން ކަމަށްވާތީ މިވަގުތު ވެރިކަން ކުރަމުންދަނީ އެޕާޓީގެ އުސޫލްތަކާއި ފިކުރާއި އެއްގޮތް ޕާޓީއެއް ކަމުގައިވާ ޕީޕަލްސް ނޭޝަނަލް ކޮންގްރެސް (ޕީއެންސީ) ކަމަށްވެފައި، އެޕާޓީއާއި ޕީޕީއެމްގެ ގިނަ އަދަދެއްގެ މެންބަރުން ގުޅެމުން ދިއުމާއެކު ޕާޓީގެ ލީޑާޝިޕަށް ވަކިން ސިޔާސީ ހަރަކާތެއް ކުރިއަށް ގެންދިއުމުގެ ބޭނުން ނުފެންނަތީ ކަމަށް ބުނެ އެވެ.

އިލެކްޝަންސް ކޮމިޝަނުން ބުނީ ސިޔާސީ ޕާޓީގެ ގާނޫނުގެ 30 ވަނަ މާއްދާގެ (ހ)ގެ 2 ވަނަ ނަންބަރުގައިވާ ގޮތުގެމަތިން ޕީޕީއެމް އުވާލުމަށް އެ ޕާޓީގެ ސެނެޓުން ނިންމައި، ފުރިހަމަ ކުރަންޖެހޭ ކަންކަން ފުރިހަމަކޮށް އިލެކްޝަންސް ކޮމިޝަނަށް ހުށަހަޅާފައިވާތީ، މިއަދުން ފެށިގެން އެ ޕާޓީ އުވާލާފައިވާ ކަމަށެވެ. އަދި އެ ކޮމިޝަނުގެ ސިޔާސީ ޕާޓީގެ ދަފްތަރުން ވެސް އުނިކޮށްފައިވާ ކަމަށް އީސީން ބުންޏެވެ.

އިލެކްޝަންސް ކޮމިޝަނުން ޕީޕީއެމް އުވާލިއިރު އެ ޕާޓީގެ ދަފްތަރުގައި މިދިޔަ އަހަރު ނިމުނުއިރު 12،174 މެންބަރުން ތިއްބެވެ. ޕީޕީއެމް ރަސްމީކޮށް ރަޖިސްޓްރީކުރީ 27 އޮކްޓޫބަރު 2011 ގަ އެވެ.

ޕީޕީއެމްގެ އިތުރުން ކުރީގެ ރައީސް މައުމޫން ފަހުން އުފެއްދެވި މޯލްޑިވްސް ރިފޯމް މޫވްމަންޓް (އެމްއާރުއެމް) ވެސް އިލެކްޝަންސް ކޮމިޝަނުން ވަނީ އުވާލާފަ އެވެ. އެ ޕާޓީ އުވާލީ ސިޔާސީ ޕާޓީގެ ގާނޫނުގެ ދަށުން ސިޔާސީ ޕާޓީގައި ހަމަވާންޖެހޭ މެންބަރުންގެ އަދަދު ހަމަނުވާތީ އެވެ.