މާލޭ ސިޓީ ކައުންސިލްގެ ލޭންޑް ސެކްޝަނުން ރަށްވެހިކަމާއި ގޯތީގެ ރެޖިސްޓްރީތައް ގެއްލިފައިވާ ކަމަށާއި، ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރް) އާ ގުޅިގެން އެ ޑޭޓާތައް ހޯދުމުގެ މަސައްކަތް ކުރަމުންދާ ކަމަށް އެ ކައުންސިލުން ބުނެފި އެވެ.

މިދިޔަ ހަފްތާގެ ބުރާސްފަތި ދުވަހު ހެނދުނު ހިނގި އަލިފާނުގެ ހާދިސާގެ ސަބަބުން އެންމެ ބޮޑަށް ގެއްލުންވީ އެތަނުގައި ހިންގަމުންދިޔަ މާލެ ސިޓީ ކައުންސިލުގެ ލޭންޑް ބިލްޑިން އެންޑް ވައިޓަލް ސާވިސަސް ޑިޕާޓްމަންޓަށެވެ.

ސިޓީ ކައުންސިލުގައި ހުރީ، އުފަންވުމާއި މަރުވާ މީހުންގެ ރެޖިސްޓްރޭޝަންތަކާއި ލިޔެކިޔުންތަކާއި، ރަށްވެހިކަމާއި ގޯތިތަކުގެ ރެޖިސްޓްރޭޝަން ފަދަ ތަކެތީގެ އަސްލުކަމަށާއި އެ ހުރިހާ އެއްޗެއް ވެސް ގެއްލިފައިވާ ކަމަށް އެ ކައުންސިލުން ވަނީ ބުނެފަ އެވެ.

ސިޓީ ކައުންސިލުގެ ލިޔެކިޔުންތައް ބަހައްޓާފައި ހުރިތަނުން ބައެއް ހަރުތައް އެއްކޮށް އަނދާ އަޅިއަށްވެފައިވާ ކަމަށާއި ނަމަވެސް އެމްއެންޑީއެފްގެ ފަޔާ ފައިޓަރުން އެތަނުން ބައެއް ލިޔުންތައް ސަލާމަތް ކުރިކަމަށް ވެ އެވެ. އެހެން ނަމަވެސް އެ ލިޔުންތަކަށް ފެނުގެ އަސަރު ކޮށްފައިވާތީ، އެ ތަކެތި ހިއްކުމުގެ މަސައްކަތް ވެސް ސިޓީ ކައުންސިލުން ކޮށްފައިވެ އެވެ.

މިއަދު ކުރިއަށްދިޔަ ކައުންސިލްގެ ހަތަރުވަނަ ދައުރުގެ 176 ވަނަ ޖަލްސާގައި ވާހަކަ ދައްކަވަމުން ޑެޕިއުޓީ މޭޔާ އަހުމަދު ނަރީޝް ވިދާޅުވީ، ގެއްލުނު މައުލޫމާތާއި، އެތައް ޒަމާނެއް ވަންދެން ނުލިބި ހުރި މައުލޫމާތުތައް ޑީއެންއާރުން ކައުންސިލަށް ދޭން އެއްބަސްވެފައިވާ ކަމަށެވެ. އެގޮތުން، މާލެ ސަރަހައްދާއި ރާއްޖޭގައި ރަށްވެހިކަން އޮންނަ ފަރާތްތަކުގެ ރެޖިސްޓްރޭޝަނުގެ ކޮޕީ މާލެ ސިޓީ ކައުުންސިލަށް ފެންނާނެ އިންތިޒާމް ޑީއެންއާރުން ހަމަޖައްސައިދޭނެ ކަމަށް ނަރީޝް ވިދާޅުވި އެވެ.

"ލޭންޑް ސެކްޝަނުން ގެއްލިގެން މިދިޔަ އެންމެ ޒަމާންވީ ރެޖިސްޓްރީތައް އޭގެ އެންމެ އިހުގެ ގަޒިއްޔާތަކުން ފެށިގެން އެންމެ ފަހާ ހަމައަށް އެ ބޭފުޅުންގެ އަތުގައި ކޮޕީ ހުރި ހުރިހާ އެއްޗެއް އަޅުގަނޑުމެންނަށް ދެއްވަން އެބޭފުޅުން އެއްބަސްވެއްޖެ،" ނަރީޝް ވިދާޅުވި އެވެ.

ނަރީޝް ވިދާޅުވީ، ކޯޑިނޭޝަން ޓީމުން މިހާރު މަސައްކަތް ކުރަމުންދަނީ އެ ޑޭޓާތައް އަވަހަަށް ހޯދުމަށް ކަމަށެވެ.