ހަގީގީ ލޯބި ހޯދުމަކީ ހަމަ ކޮންމެ މީހެއްގެ ވެސް ހުވަފެނެކެވެ. އެ ހުވަފެން ހާސިލް ކުރުމަށްޓަކައި ކޮންމެ މީހަކުވެސް ގަދައަޅާ މަސައްކަތް ކުރެ އެވެ.

މިފަހަރު މިއޮތީ އެ ހުވަފެން ހާސިލް ކުރުމަށްޓަކައި ތަފާތު ދަތުރެއް ކުރި މީހެއްގެ ވާހަކަ އެވެ. ސައޫދީ އަރަބިއާއަށް ނިސްބަތްވާ އުމުރުން 63 އަހަރުގެ އަބޫ އަބްދުﷲއަކީ ހަގީގީ ލޯބި ހޯދަން 53 ފަހަރު ކައިވެނިކުރި މީހެކެވެ.

އަބޫ އޭނާގެ އެންމެ ފުރަތަމަ ކައިވެނި ކޮށްފައިވަނީ އުމުރުން އެންމެ 20 އަހަރުގައި އޭނާއަށްވުރެ ހަ އަހަރު ދޮށީ އަންހެނަކާ އެވެ. އެ ކައިވެންޏަށް އޭނާއަށް ދަރިން ވެސް ލިބުނެވެ.

އެހެން ނަމަވެސް އެ ކައިވެނި ރޫޅުމުން ޖެހިގެން އައި 43 އަހަރު ތެރޭގައި އަބޫ ވަނީ އެކި އުމުރުފުރާތަކުގެ އަންހެނުންނާ އިތުރު 52 ކައިވެންޏެއް ކޮށްފަ އެވެ.

އަބޫ ބުނި ގޮތުގައި ގިނަ ކައިވެނިތަކެއް ކުރުމަކީ އޭނާ ބޭނުންވި ގޮތެއް ނޫނެވެ. އެހެން ނަމަވެސް ފުރަތަމަ ކައިވެނި ރޫޅުމުން އޭނާ ބޭނުންވީ ސިކުނޑީގެ ހަމަޖެހުން ހޯދާށެވެ.

ފާއިތުވި 43 އަހަރު ތެރޭގައި އެއް ފަހަރާ ހަތަރު އަންހެނުންނާ ކައިވެނި ކޮށްގެން އަބޫ އުޅުނުއިރު ހުރިހާ އަނބިންނަށް ވެސް ހަަމަހަމައަށް ކަންތައް ކުރަން އިސްކަން ދިން ކަމަށް އަބޫ ބުންޏެވެ.

އަބޫ އިތުރަށް ބުނީ އޭނާގެ އެންމެ ކުރު ކައިވެނީގެ ދިގުމިނަކީ އެއްރޭ ކަމަށާއި ލޯތްބާއި ހިތްހަމަޖެހުން ބޮޑަށް ލިބެނީ އުމުރުން ދޮށީ އަންހެނުންނާއެކު ކަމަށެވެ.