ހޮލީވުޑްއާއި ބޮލީވުޑްގައި ވެސް އެންމެ މަދުން އެކަމެއްގެ ވާހަކަ ދެކެވޭ ކަމަކީ ފިލްމީ ތަރިންގެ އުމުރެވެ. މަޝްހޫރު ތަރިންގެ އުމުރުގެ ވާހަކަ ފާޅުގައި ދެއްކުމަކީ އާއްމުކޮށް ނުފެނުނަސް މަދުން ނަމަވެސް އެ ވާހަކަ ފެންމަތިވެ އެވެ.

އެގޮތުން އެންމެ ފަހުން އުމުރުގެ މައުލޫ ނިސްބަތްވި ތަރިއަކީ ހޮލީވުޑްގެ ކާމިޔާބު އެކްޓަރު ޖެނިފާ ލޮޕޭޒް (ޖޭލޯ) އެވެ. އޭނާގެ އެންމެ ފަހުގެ ފިލްމު "އަންސްޓޮޕަބަލް"ގެ ޕްރިމިއާގެ ތެރެއިން ދިން އިންޓަވިއުއެއްގައި އޭނާގެ އުމުރުގެ ވާހަކަ ދެކެވުނެވެ.

ފާއިތުވި 30 އަހަރު ދުވަހުގެ ތެރޭގައި ޖޭލޯ ހޮލީވުޑްގައި ހޯދި ކާމިޔާބީއަށް އަލިއަޅުވާލި އެ އިންޓަވިއުގައި އިންޓަވިއު ކުރަން އިން ކްލޭޓަން ޑޭވިސް ވަނީ އުމުރުން 55 އަހަރުގެ ޖޭލޯ "ކުރިއަށް ޖެހެމުން" އަންނަ ކަމަށް ބުނެފަ އެވެ.

އޭނާ އެހެން ބުނުމުން އެތަނަށް އެއްވެ ތިބި އެއްބަޔަކު ހައިރާން ކަމާއެކު އެއީ ހަމަ ހަގީގަތްތޯ ސުވާލުކުރިއިރު އަނެއްބަޔަކު ވަނީ އެއީ މާބޮޑު ކަމަކަށް ނުހަދައި ޖޯކަކަށް ނަގާފަ އެވެ.

ދެން އޮތީ އެ ކޮމެންޓަށް ހުދު ޖޭލޯގެ ރައްދެވެ. ޒާތީ ގޮތުން އެ ކޮމެންޓު ބަލައިގަތުމުގެ ބަދަލުގައި ޖޭލޯވެސް ވަނީ އެކަން މަޖަލަކަށް ހަދައި އެ އަހަރުތަކުގައި ބެލުންތެރިން އޭނާއަށް ސަޕޯޓުކުރީތީ ޝުކުރު އަދާކޮށްފަ އެވެ.

ބުނެވޭ ގޮތުގައި ކްލޭޓަން ޖޭލޯގެ އުމުރުގެ ވާހަކަ އިންޓަވިއުގެ ތެރެއިން ގެނައުމުގެ ފަހަތުގައި ވަނީ އޭނާއާއި ޖޭލޯގެ ގާތް ރަހުމަތްތެރި ކަމެވެ.