ހުޅުމާލޭގައި ރޭ ކުރި މުޒާހަރާ އިން ހައްޔަރުކުރި ތިން ޓެކްސީ ޑްރައިވަރުންގެ ފޮޓޯއާއެކު ވަނަވަރު ފުލުހުން މިއަދު ހާމަކޮށްފި އެވެ.

ފުލުހުން ހައްޔަރުކުރީ މއ. ވިރާހު، މުހައްމަދު ޝާމިން އާއި ލ. ދަނބިދޫ، ސަންރޭ، އަހްމަދު ޝަބީންގެ އިތުރުން ހދ. ކުމުންދޫ، ހޮލިޑޭވިލެޖް، ނުއުމާން އަހްމަދެވެ.

ފުލުހުން ބުނީ އެ މީހުން ހައްޔަރުކުރީ ޓެކްސީ ޑްރައިވަރުން ކުރިއަށްގެންދިޔަ މުޒާހަރާގެ ތެރެއިން އާންމު ދަތުރުފަތުރަށް ހުރަސްއަޅައި ހުޅުމާލޭގެ މަގުތައް ބްލޮކްކޮށްފައިވާ މައްސަލައާ ގުޅިގެން ކަމަށެވެ.

ޓެކްސީ ކުރަމުން އައި ހަތަރު ކާރު ފުލުހުން ވަނީ ޓޯކޮށްފަ އެވެ.

އެ މައްސަލާގައި ހައްޔަރުކުރި މީހުންގެ ތެރެއިން ޝާމިން އާއި ޝަބީން ފަސް ދުވަހަށް ބަންދުގައި ބަހައްޓަން ވަނީ އަމުރުކޮށްފަ އެވެ. އަދި ޝަރުތުތަކާއެކު ނުއުމާން ދޫކޮށްލަން ވަނީ އަމުރުކޮށްފަ އެވެ.

ޓެކްސީ ޑްރައިވަރުން އިއްޔެ މުޒާހަރާ ކުރީ ސަރުކާރުން ޓެކްސީގެ ހިދުމަތް ފަށަން ނިންމުމާ ގުޅިގެންނެވެ. އެކަމުގެ ސަބަބުން ޓެކްސީ ޑްރައިވަރުންނަށް ލިބެމުން އަންނަ އާމްދަނީ ހުއްޓީ މާލީގޮތުން ބޮޑެތި ދަތިތަކަކާ ކުރިމަތިލާންޖެހިދާނެ ކަމަށް ޓެކްސީ ޑްރައިވަރުން އަންނަނީ ބުނަމުންނެވެ.

ރޭ 22 ކާރު ޓޯކުރުމުން ގިނަ އާއިލާތަކެއްގެ އާމްދަނީ ހުއްޓި ދަތިތަކަކާ ކުރިމަތިލާންޖެހިފައިވާ ކަމަށް ބުނެ ސޯޝަލް މީޑިއާގައި ގިނަ ބަޔަކު އަންނަނީ ކަންބޮޑުވުންފާޅުކުރަމުންނެވެ.

މިކަމާ ގުޅޭގޮތުން ސަރުކާރުން މިހާތަށް އެއްވެސް އެއްޗެއް ބުނެފައެއްނުވެ އެވެ.