ވެރިކަމުގައި ގިނަ ދުވަހު ތިބުމުގެ މަގުސަދުގައި ކަންކަން ކުރަމުންދާއިރު، ބޭރު ދުނިޔޭގައި މި ރާއްޖެވެފައި ވަނީ ބޮޑު އަރަތަކަށް ކަމަށާއި ގައުމުގެ މުގައްދަސް ސިފަތައް ރައްކާތެރި ކުރެވިގެން މެނުވީ އެކަކަށް ވެސް ރައްކާތެރިކަމެއް ނެތްކަމަށް ހޯރަފުށީ ދާއިރާގެ ކުރީގެ މެންބަރު އަހުމަދު ސަލީމް (ސައްލެ) ވިދާޅުވެއްޖެ އެވެ.

"ގާނޫނުއަސާސީގެ ދިފާއުގައި" އެމްޑީޕީން ރޭ ބޭއްވި ބޮޑު ޖަލްސާގައި ވާހަކަދައްކަވަމުން ސައްލެ ވިދާޅުވީ މިއަދު ކަންކަން ހިނގަމުންދާގޮތަކީ ގޮންމުށުގެ ވެރިކަން، ހުދުމުހުތާރު ވެރިކަން ހިނގަމުންދިޔަ ގައުމުތަކުގައި އެތަންތާގެ ވެރިން ހިތަށް އެރި ކޮންމެ ކަމެއް ގާނޫނަށް ހަދަމުން ދިޔަގޮތަށް ކަމަށެވެ. އަދި ރާއްޖޭގައި ދާދި މިދާކަށް ދުވަހު މެންބަރުންގެ ނަޒާހަތްތެރިކަން ހިފެހެއްޓުމަށް ކަމަށް ބުނެ ހައެއްކަ ގަޑިއިރު ތެރޭގައި ގާނޫނުއަސާސީއަށް ބަދަލު ގެނައީ ރައްޔިތުން ކައިރީގައި ހޭވެސް އަހާނުލާ ކަމަށް އޭނާ ވިދާޅުވި އެވެ.

"މެމްބަރުންގެ ނަޒާހަތްތެރިކަން ހިފެހެއްޓުމަށްކަމަށް ބުނެ ގާނޫނުއަސާސީއަށް ބަދަލު ގެނައި އިރު، އޭގެ ދުވަސްކޮޅެއް ކުރިން އެ ވިދާޅުވާ ބޭފުޅުން އެމްޑީޕީން 13 މެމްބަރުން ގެންދިއަ އިރު ނަޒާހަތްތެރިކަމުގެ ސުވާލެއް ވެސް ނެތް،" ސައްލެ ވިދާޅުވި އެވެ.

އޭނާ ވިދާޅުވީ ގައުމީ މަސްލަހަތަށް ބެލުމެއް ނެތި މި ޒާތަށް ހެދޭ ގާނޫނުތައް ރާއްޖޭގައި ނިމިދާތަން ފެންނަނީ ދިއްގާމަލުގެ މިސާލުގައި ކަމަށެވެ. އަދި ވެރިކަމުގައި ގިނަ ދުވަހު ތިބުމުގެ މަގުސަދުގައި ކަންކަން ކުރަމުންދާއިރު، ބޭރު ދުނިޔޭގައި މި ރާއްޖެވެފައިވަނީ ބޮޑު އަރަތަކަށް ކަމަށާއި އާރު ނުލާ ޅޮސްގަނޑަކަށް ވެފައިވާ ކަމަށާއި، ގައުމުގެ މުގައްދަސް ސިފަތައް ރައްކާތެރި ކުރެވިގެން މެނުވީ އެކަކަށް ވެސް ރައްކާތެރިކަމެއް ނެތްކަމަށް ސައްލެއް ވިދާޅުވި އެވެ.

އޭނާ ވިދާޅުވީ ގާނޫނުއަސާސީ ދިފާއުކުރަން ޖެހުމޭ ބުނުމަކީ އާދައިގެ ކުޑަކުޑަ ކަމެއް ނޫން ކަމަށާއި އެއިން ދޭހަވަނީ ގައުމުގެ އެންމެ މަތީ ދުސްތޫރުގެ ހައިސިއްޔަތުން އެ މައްޗަށް ލާޒިމްކުރާ ވާޖިބުތައް އަދާކުރުމުގައި ގާނޫނުއަސާސީ ނުކުޅެދިއްޖެކަމާއި، ގާނޫނު އަސާސީގެ ހުރުމަތް ކެނޑިއްޖެކަމާއި، ފަރުދީ ހައްގުތައް ރައްކާތެރިކުރުމަށް ހުރަސް އެޅިއްޖެކަން ކަމަށެވެ.

"ބުނެވޭ އެއްޗަކުން، ބަނޑޭރިގޭ އަށިމަތިން، މުލިއާގޭ ދިގު ގޮނޑިމަތިން ހުރަގެއަށް ގެންގޮސް އަނދަގޮނޑިޖަހާ ތަޅާ، ޝަރީއަތެއް ނުކޮށް، ހުކުމެއް ނުކޮށް، ދިވެހިން ގަނަތެޅުވި ޒަމާން އަންނަނީބާވައޭ އަޅުގަނޑުމެންނަށް މިއަދު ހިތަށް އެބައަރާ،" ސައްލެ ވިދާޅުވި އެވެ.

އޭނާ ވިދާޅުވީ ގާނޫނުއަސާސީ ދިފާއުކުރަން ޖެހުމޭ ބުނުމަކީ ދައުލަތް ހިންގުމަށް ކަނޑައަޅާފައިވާ އޮނިގަނޑަށް ބުރަ އަރާފައިވާ ވާހަކައާއި ދައުލަތުގެ ޗެކް އެންޑް ބެލެންސް ގެއްލިއްޖެ ވާހަކަ ކަމަށެވެ. އަދި މުޖްތަމައުގެ ހަމަޖެހުމާއި ރައްކާތެރިކަމަށް ކޮށާފައިވާ މަގުތައް ބެދިއްޖެކަމާއި، ކުރުގޮތަކަށް ދަންނަވާނަމަ ރައްޔިތުންގެ އަތުގައި އޮތް ބާރު ގެއްލިއްޖެ ވާހަކަ ކަމަށް އޭނާ ވިދާޅުވި އެވެ.