ބޮލީވުޑްގެ ތަރި ސަލްމާން ޚާންގެ މަންމަ ސަލްމާއާއި ދޮންމަންމަ ހެލެން އެކުގައި ފެންނަ ވީޑިއޯއެއް ސޯޝަލް މީޑިއާގައި އާއްމުވެއްޖެ އެވެ.

ހަބަރުތައް ބުނާ ގޮތުގައި މިހާރު ދައުރުވަމުން އަންނަނީ ސަލްމާގެ އުފަން ދުވަހުގެ މުނާސަބަތުގައި ބޭއްވި ހަފްލާއެއްގެ ތެރެއިން ނަގާފައިވާ ވީޑިއޯ އެކެވެ.

އެ ވީޑިއޯގައި ފެންނަނީ ސަލްމާއާއި ހެލެން އެކުގައި ލަވައަކަށް ނަށާ މަންޒަރެވެ. ފެންނަ ފެނުމަށް އެ ދެމީހުންގެ ގުޅުން ވަރަށް ރަނގަޅެވެ.

ސަލްމާއާއި ހެލެންއަކީ ވެސް ބޮލީވުޑްގެ ކާމިޔާބު ސްކްރީންރައިޓާ ސަލީމް ޚާންގެ ދެ އަނބިންނެވެ. 1964 ވަނަ އަހަރު އޭނާ ސަލްމާއާ ކައިވެނިކުރިއިރު ހެލެންއާ ކައިވެނިކުރީ 1981 ވަނަ އަހަރު އެވެ.

ސަލީމްއާއި ސަލްމާއަށް ހަތަރު ކުދިން ލިބުނެވެ. އެއީ ސަލްމާން ޚާންގެ އިތުރުން ސުހައިލް ޚާން، އަރްބާޒް ޚާން އަދި އަލްވީރާ ޚާން އެވެ.

ހެލެންއާއެކު ސަލީމްއަށް އަމިއްލަ ދަރިއަކު ލިބިފައި ނުވި ނަމަވެސް އެ ދެމީހުން ވަނީ މުމްބާއީގެ ނިކަމެތި ކުއްޖެއްގެ ބަލަދުވެރިކަން ނަގާފަ އެވެ. އެއީ އަރްޕިތާ ޚާން އެވެ.

ސަލްމާގެ އުމުރުން 78 އަހަރު ފުރިފައިވާއިރު އެކަމުގެ އުފަލުގައި ސަލްމާންއާއި އޭނާގެ އެހެން ދަރިން ވެސް ވަނީ ސޯޝަލް މީޑިއާގައި އޭނާއަށް ތަހުނިޔާ ކިޔާފަ އެވެ.