މަޝްހޫރު އިނގިރޭސި ލަވަކިޔުންތެރިޔާ ޖަސްޓިން ޓިމްބާލޭކްގެ މައިބަދައަށް ލިބުނު އަނިޔާއަކާ ގުޅިގެން އިއްޔެ ބާއްވަން އޮތް އޭނާގެ ކޮންސެޓް ކެންސަލް ކޮށްފި އެވެ.

ޖަސްޓިން އޭނާގެ އިންސްޓަގްރާމް ސްޓޯރީ މެދުވެރިކޮށް އާއްމުކުރި މެސެޖެއްގައި ބުނެފައިވަނީ އޭނާގެ ޑޮކްޓަރުންގެ އިރުޝާދާއެކު އޮކްލަހޯމާގައި ބާއްވަން އޮތް ކޮންސެޓް ކެންސަލް ކުރަން ޖެހޭތީ މައާފަށް އެދޭ ކަމަށެވެ.

އެއާއެކު ޖަސްޓިން ވަނީ އޭނާއަށް ސަޕޯޓަރުންގެ ފަރާތުން ކެނޑިނޭޅި ލިބެމުން އަންނަ ލޯތްބާއި އެއްބާރުލުމަށް ޝުކުރު އަދާކޮށްފަ އެވެ.

ޖަސްޓިންގެ ރަސްމީ ވެބްސައިޓްގައި ބުނެފައިވަނީ "ފޮގެޓް ޓުމޯރޯ ވޯލްޑް ޓުއާ"ގެ ތެރެއިން އޮކްލަހޯމާގައި ބާއްވަން އޮތް ކޮންސެޓަށް ޓިކެޓު ގަތް ފަރާތަކަށް ފައިސާ އަނބުރާ ދެވޭނެ ކަމަށެވެ.

މިއީ ސިއްހީ ހާލަތުގެ ސަބަބުން ޖަސްޓިން އޭނާގެ ކޮންސެޓް ކެންސަލްކުރި ފުރަތަމަ ފަހަރެއް ނޫނެވެ. ނޭވާލާ ނިޒާމަށް ޖެހޭ ބައްޔެއްގެ ސަބަބުން މިދިޔަ އޮކްޓޯބަރު މަހު ބާއްވަން އޮތް ދެ ކޮންސެޓެއް ވެސް އޭނާ ވަނީ ކެންސަލް ކޮށްފަ އެވެ.

ރިޕޯޓުތައް ބުނާ ގޮތްުގައި ޑޮކްޓަރުންގެ ލަފައާއެކު އަރާމު ކުރުމަށްފަހު ޖަސްޓިންގެ ކޮންސެޓެއް ދެން އެންމެ އަވަހަށް އޮންނާނީ މާދަމާ ހޫސްޓަންގެ ޓޮޔޯޓާ ސެންޓަރުގަ އެވެ.

މިދިޔަ ސެޕްޓެމްބަރު މަހު މަސްތުގެ ހާލަތުގައި އެއްގަމު އުޅަނދު ދުއްވުމުގެ ތުހުމަތުގައި ހައްޔަރު ކުރެވުނު ޖަސްޓިން ވަނީ އެ މައްސަލާގައި 500 އެމެރިކާ ޑޮލަރުން ޖޫރިމަނާކޮށް 24 ގަޑިއިރު އިޖުތިމާއީ ހިދުމަތަށް ނުކުންނަން ޖެހިފަ އެވެ.