މ. މުލަކުގައި ފަތުރުވެރިކަމުގެ ދާއިރާއިން ތައުލީމާއި ތަމްރީނުދީ، ދާއިރާއިން މީހުން ބިނާކުރުމަށް ހާއްސަ މަރުކަޒެއް ގާއިމްކުރުމަށް ނިންމައިފި އެވެ.

މ. މުލަކު ކައުންސިލުން ބުނީ، ފަތުރުވެރިކަމުގެ ދާއިރާއިން ތައުލީމާއި ތަމްރީންދީ މީހުން ބިނާކުރާނެ މަރުކަޒެއް ގާއިމްކުރުމަށް އެރަށުން 53،000 އަކަފޫޓުގެ ބިން ދޫކުރަން ހަމަޖެހިފައިވާކަމަށެވެ. އެކަމަށް ޝައުގުވެރިވާ ފަރާތްތަކުން ބީލަން ހުށައެޅުމުގެ ފުރުސަތު މިހާރު އެރަށު ކައުންސިލުން ވަނީ ހުޅުވާލާފަ އެވެ. ބީލަން ހުށައެޅުމުގެ ސުންގަޑި އަކީ ޑިސެމްބަރު 5 ވަނަ ދުވަހެވެ.

އެކައުންސިލުން ކޮށްފައިވާ އިއުލާނުގައި ބުނާގޮތުން ބީލަން ހުށައެޅޭނީ ރާއްޖޭގައި ރަޖިސްޓްރީކޮށްފައިވާ ވިޔަފާރިތަކަށެވެ. އަދި ބިން ދޫކުރާނީ 50 އަހަރުގެ މުއްދަތަކަށެވެ. މި އިމާރާތް 18 މަސްދުވަހުގެ ތެރޭގައި އަޅައި ނިންމަންޖެހޭނެކަމަށްވެސް ބުނެފައިވެ އެވެ.

މިހާރު ފަތުރުވެރިކަމަށް 3 ބިމެއް ހުޅުވާލާފައިވާއިރު، މިތަނުން އެއް ބިމަކީ ފަތުރުވެރިކަމުގެ ދާއިރާއިން މީހުން ބިނާކުރުމަށް މަރުކަޒެއް އެޅުމަށް ހުޅުވާލާފައިވާ ބިމެކެވެ.