މެދުކެނޑުމެއް ނެތި މާ ގިނައިރު އިށީނދެގެން އިނުމަކީ ހިތުގެ ބަލިތަކަށް މަގުފަހިވާ ކަމެއް ކަމަށް މިފަހުން ކުރެވުނު ދިރާސާއަކުން ދައްކައިފި އެވެ.

ބޮސްޓަންގެ ބްރިގަން އެންޑް ވުމަންސް ހޮސްޕިޓަލްއިން ކުރިއަށް ގެންދިޔަ އެ ދިރާސާގައި ބުނެފައިވަނީ ގަވާއިދުން ކަސްރަތު ކުރިނަމަވެސް ދުވާލުގެ ގިނަ ވަގުތު އިށީނދެ އިންނަނަމަ ކަސްރަތުން ކުރާނެ ފައިދާއެއް ނޯންނާނެ ކަމަށެވެ.

"މި ދިރާސާއިން އެނގިގެން ދިޔައީ ޖިސްމާނީ ގޮތުން ހަރަކާތްތެރިވެ އުޅުނަސް ނޫޅުނަސް މާ ގިނައިރު އިށީނދެ ނީނުމުގެ މުހިއްމުކަން" ދިރާސާގައި އިސްކޮށް އުޅުއްވި ޑރ. އެޒިމް އަޖޫފޯ ވިދާޅުވި އެވެ.

ޑރ. އެޒިމް އިތުރަށް ވިދާޅުވީ މާ ގިނައިރު އިށީނދެ އިނުމަކީ އާއްމު ސިއްހަތަށް ގެއްލުންހުރި ކަމެއްކަން އެނގޭ ނަމަވެސް އެކަމުގެ ސީދާ ނުރައްކާތައް ހޯދަން އިތުރު ދިރާސާތައް ކުރަންޖެހޭ ކަމަށެވެ.

ޖުމްލަ 90،000 މީހުން ބޭނުންކޮށްގެން ކުރިއަށް ގެންދިޔަ އެ ދިރާސާގެ ނަތީޖާތައް ދައްކާ ގޮތުގައި ގިނައިރު އިށީނދެ ތިބޭ މީހުންނަށް ސްޓްރޯކްއާއި ހާޓް އެޓޭކް ފަދަ ހިތުގެ ބަލިތައް ޖެހުން އިތުރެވެ.

އެ ދިރާސާގައި ބައިވެރިވި ޑޮކްޓަރުން ވިދާޅުވާ ގޮތުގައި ދުވާލަކު 10 ގަޑިއިރަށްވުރެ ގިނައިރު އިށީނދެ އިނުމަކީ ސިއްހަތަށް ގެއްލުންހުރި ކަމެކެވެ.

އެހެން ކަމުން ދުވާލުގެ ގިނަ ވަގުތު އިށީނދެ އިނުމުގެ ބަދަލުގައި ވީހާވެސް ހަރަކާތްތެރިވެ އުޅުން ގިނަ ކުރުމަށް އެބޭފުޅުން ލަފާދެ އެވެ.