ބާރުގަދަ މީހުން ތަޅުލައިގެން ތިބުމުގެ ސަބަބުން މީގެ ކުރިން ސަރުކާރުތަކަށް ނިންމަން ނުކެރި ހުރި ކަންކަން ނިންމަމުންދާ ކަމަށް ވިދާޅުވެ ރައީސް މުހައްމަދު މުއިއްޒު ވިޔަފާރިވެރިންނަށް ރައްދު ދެއްވައިފި އެވެ.

ރާއްޖެއަށް ދަތުރުކުރާ ބިދޭސީންގެ އަތުން އެއާޕޯޓުން ނަގާ ފީއާއި ޓޫރިޒަމުން ނަގާ ޓީޖީއެސްޓީއާއި ގްރީން ޓެކްސް ބޮޑުކުރަން ނިންމުމުގެ އިތުރަށް ޓޫރިޒަމް ވިޔަފާރިތަކުން ބޭރު ފައިސާ މާރުކުރަން މަޖުބޫރުވާ ގޮތަށް ސަރުކާރުން ގެނައި ބަދަލުތަކަށް ބައެއް ވިޔަފާރިވެރިންގެ ނުރުހުން ލިބިފައިވެ އެވެ.

ހުޅުމާލެގައި ތަރައްގީކުރި ބުޅާ ފެސިލިޓީ ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް މުއިއްޒު ވިދާޅުވީ އެ ނިންމުންތަކަކީ ރައްޔިތުންގެ އިހުސާސްތައް ދަނެ، ރައްޔިތުންނަށް ޓަކައި ސަރުކާރުން ނިންމާފައިވާ ނިންމުންތަކެއް ކަމަށެވެ.

ރައީސް ވިދާޅުވީ އެތައް ދުވަހެއްވީ، އަތްލާން ނުކުރިފައި ހުރި ބޮޑެތި އެތައް ކަމެއް، ބާރުގަދަ އެތައް ބަޔެއްގެ ބާރުތަކުގެ ތެރޭގައި ތަޅުލެވިފައި ހުރި އެތައް ކަމެއް ރައްޔިތުންގެ ފަޅިއަށް ސަރުކާރު ޖެހިލައިގެން ހައްލު ކުރަމުން ދާކަމަށެވެ.

ރައީސް ރައްޔިތުންގެ ފަޅީގައި ހުންނެވިކަމަށް ވިދާޅުވެފައިވާއިރު، އާސަންދަ ހިދުމަތަށް ސަރުކާރުން ގެނައި ބަދަލާއެކު ޕްރައިވެޓް އިންސުއަރެންސް ބޭނުންކުރާ ރައްޔިތުންނަށް އާސަންދަ ލިބޭނީ އޭގެ ލިމިޓް ހަމަވުމުންކަމަށް ނިންމުމާއެކު އެތައް ރައްޔިތުންނެއް ދަނީ ކަންބޮޑުވުން ފާޅުކުރަމުންނެވެ.