ސިޔާސީ މަގާމެއްގައި ހުރި މީހަކަށް ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ހައި ކޯޓުން މިއަދު ކަނޑައަޅައިފި އެވެ.

ހައި ކޯޓުން މިފަދައިން ނިންމީ އެންވަޔަރަމަންޓް މިނިސްޓްރީގެ ނައިބު، މުހައްމަދު ރާގިބު އަހުމަދު، ދައުލަތާ ދެކޮޅަށް ވަކާލާތު ކުރާތީ އެކަން އެގޮތަށް ނުކުރެވޭނެ ކަމަށް ބުނެ ދައުލަތުން އެކަމަށް އިއުތިރާޒުކުރުމުންނެވެ.

އޭނާ ކޯޓަށް ވަޑައިގަތީ ޖިންސީ ގޯނާގެ މައްސަލައެއްގައި ދައުވާ އުފުލާފައިވާ މީހެއްގެ އަޑުއެހުމަށެވެ.

ޕީޖީ އޮފީހުން ހައިކޯޓުގައި ބުނީ ކުޑަކުދިންގެ ހައްގުތައް ރައްކާތެރިކުރުމާ ބެހޭ ގާނޫނުގައި، އެ ކުދިންގެ ހައްގުތައް ރައްކާތެރިކުރުމާއި އެ ކުދިން ޖިންސީ އަނިޔާއިން ރައްކާތެރިކުރުމަކީ ދައުލަތުގެ ޒިންމާއެއް ކަމަށް ބަޔާންކޮށްފައިވާ ކަމަށެވެ. މި ހާލަތުގައި، ސިޔާސީ މަގާމެއްގައި ހުރި މީހަކު ދައުލަތާ ދެކޮޅަށް ކޯޓުގައި ވަކާލާތުކުރުމުން މަސްލަހަތު ފުށުއަރާ ކަމަށް ޕިޖީ އޮފީހުން ބުންޏެވެ.

އެކަމަށް ރައްދުދެއްވައި ރާގިބު ވިދާޅުވީ ޕީޖީ އޮފީހަކީ ދައުލަތް ނޫން ކަމަށާއި އެއީ ދައުލަތުގެ މުއައްސަސާއެއް ކަމަށެވެ. އޭނާ ދެން ވިދާޅުވީ މާލީ ތަނަވަސްކަން ނެތް މީހުންނަށް ޖިނާއީ މައްސަލަތަކުގައި އެޓާނީ ޖެެނެރަލްގެ އޮފީހުން ވަކީލުން ހަމަޖައްސާ ކަމަށެވެ.

ހައިކޯޓުގައި އެ މައްސަލަ ބައްލަވާ ފަނޑިޔާރުންގެ ބެންޗުން ކުރި ސުވާލެއްގެ ޖަވާބުގައި ޕީޖީ އޮފީހުން ބުނީ ސިޔާސީ މަގާމެއްގައި ހުރެ ދައުލަތާ ދެކޮޅަށް ކޯޓުގައި ވަކާލާތުކުރުމަކީ މުސާރަދޭ ފަރާތް ކަމަށްވާ ދައުލަތުގެ މަސްލަހަތާ ދެކޮޅަށް މަސައްކަތްކުރެވޭ ހާލަތެއް ކަމަށް ފެންނަ ކަމަށެވެ.

ސިޔާސީ މަގާމުގައި ދެމިތިބިހާ ހިނދަކު، ކޯޓުތަކާއި ޓްރައިބިއުނަލްތަކުގައި އެފަދަ ބޭފުޅުންނަށް ދައުލަތާ ދެކޮޅަށް ވަކާލާތުކުރެވޭނެ ކަމަށް ނުފެންނަ ކަމަށް އެ އޮފީހުން ބުންޏެވެ.

ފަނޑިޔާރުންގެ ބެންޗުގެ ނިންމުމުގައި ވަނީ ދައުލަތުގެ ސިޔާސަތަކީ ދައުލަތުގެ މުވައްޒަފަކަށް ދައުލަތާ ދެކޮޅަށް ވަކާލާތު ނުކުރެވޭނެ ސިޔާސަތުކަން އެނގެން އޮންނަ ކަމަށެވެ. އަދި ގާނޫނީ ފަންނުގެ ގާނޫނުގެ ދަށުން އެކުލަވާލާފައިވާ ވަކީލުންގެ ސުލޫކީ ގަވާއިދުގައި ވެސް ދައުލަތުގެ މުވައްޒަފުން ދައުލަތާ ދެކޮޅަށް ވަކާލާތުކުރުމުން މަސްލަހަތު ފުުށުއަރާ ކަމަށް ފާހަގަކޮށްފައިވާ ކަމަށް ވެސް އެ ނިންމުމުގައިވެ އެވެ.

އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުން ނިންމީ ރާގިބަށް އެ މަގާމުގައި ހުރެ ދައުލަތާ ދެކޮޅަށް ވަކާލާތު ނުކުރެވޭނެ ކަމަށެވެ.