ރާއްޖޭގެ މަޝްހޫރު ދެ ރިސޯޓެއް ވިއްކާލުމަށް ނިންމައި ސްޓޭޓް ބޭންކް އޮފް އިންޑިއާ (އެސްބީއައި) ގެ މާލޭ ގޮފިން އެކަން އިއުލާންކޮށްފި އެވެ.

ވިއްކާލަނީ ށ. ދޮޅިޔަދޫ އައިލެންޑް ރިސޯޓާއި ގަސްވެލި ރިސޯޓެވެ. އެ ދެ ރިސޯޓް ވިއްކާލަން އެސްބީއައި އިން ނިންމީ އެ ދެ ރިސޯޓުން އެ ބޭންކުން ނެގި ލޯނުތަކަށް ދައްކަންޖެހޭ ފައިސާ ނުދައްކައިގެން ކޯޓަށް ހުށަހެޅި މައްސަލާގައި އެ ދެ ރިސޯޓް ވިއްކާލުމުގެ ހުއްދަ އެ ބޭންކަށް ސިވިލް ކޯޓުން ދިނުމުންނެވެ.

ދޮޅިޔަދޫ ރިސޯޓް ވިއްކާލާ އެންމެ ދަށް އަގަކީ 12 މިލިއަން އެމެރިކާ ޑޮލަރެވެ. ގަސްވެލި ރިސޯޓް ވިއްކާ އެންމެ ދަށް އަގަކީ އެއް މިލިއަން ޑޮލަރެވެ.

އެސްބީއައި އިން ކުރި އިއުލާނުގައި ބުނެފައި ވަނީ އެ ރިސޯޓްތައް ގަތުމަށް ޝައުގުވެރިވާ ފަރާތްތަކަށް އަންނަ ޑިސެމްބަރު މަހުގެ ދެވަނަ ދުވަހާ ހަމައަށް ބިޑް ހުށަހެޅުމުގެ ފުރުސަތު ހުޅުވާލެވިފައިވާ ކަމަށެވެ. ބިޑް ހުޅުވުން އޮންނާނީ ބިޑް ހުށަހެޅުން އޮންނާނީ ޑިސެމްބަރު ދެވަނަ ދުވަހު އެސްބީއައި މާލޭ އޮފީހުގަ އެވެ. ކަނޑައެޅިފައިވާ އެންމެ ދަށް އަގަށްވުރެ ދަށުން އަގު ހުށަހަޅާ ބިޑްތައް ބާތިލް ކުރެވޭނެ ކަމަށް އެ ބޭންކުން ބުންޏެވެ.

ބީލަމުގައި ބައިވެރިވުމަށްށްޓަކައި، ބިޑް ހުށަހަޅާ ފަރާތްތަކުން 15,000 އެމެރިކާ ޑޮލަރުގެ އާނެސްޓް މަނީ ޑިޕޮސިޓެއް ބަހައްޓަން ޖެހެ އެވެ. ފައިސާ ދެއްކުމުގެ ތާވަލުގައިވާ ގޮތުން، ބިޑު ކާމިޔާބުކުރާ ފަރާތުން އެވޯޑް ލެޓާ ލިބޭތާ ހަތް ދުވަހުގެ ތެރޭގައި ދޮޅިޔަދޫއަށް 1 މިލިއަން އެމެރިކާ ޑޮލަރު އަދި ގަސްވެލި ރިސޯޓަށް 300,000 އެމެރިކާ ޑޮލަރު ޑިޕޮސިޓް ކުރަން ޖެހެ އެވެ. ބާކީ ފައިސާ ދެއްކުމަށް ކޮންމެ ޕްރޮޕަޓީއަކަށް 30 ދުވަހާއި 60 ދުވަހުގެ މުއްދަތެއް ވަނީ ކަނޑައަޅާފަ އެވެ.