ހޮލީވުޑްގެ އެކްޓަރު ޓޮމް ހޮލޭންޑްގެ މަޝްހޫރު ފިލްމު ފްރެންޗައިޒް "ސްޕައިޑަ މޭން"ގެ ހަތަރުވަނަ ފިލްމު ސިނަމާތަކަށް އަންނަ ދުވަސް ހާމަކޮށްފި އެވެ.

ޑަސްޓިން ޑެނިއަލް ކްރެޓަން ޑައިރެކްޓްކުރާ އެ ސީކުއަލް ފިލްމަށް އަދި ނަމެއް ދީފައިނުވާއިރު ފިލްމު ރިލީޒް ކުރަން ހަމަޖެހިފައިވަނީ 2026 ވަނަ އަހަރުގެ ޖުލައި މަހުގެ 24 ވަނަ ދުވަހު އެވެ.

ޓޯކް ޝޯއެއް ކަމަށްވާ "ދަ ޓުނައިޓް ޝޯ"ގައި މެހެމާނެއްގެ ގޮތުގައި ބައިވެރިވެ ޓޮމް ހޮލޭންޑް ވަނީ ސްޕައިޑަމޭން ފްރެންޗައިޒްގެ އިތުރު ފިލްމެއްގެ މަސައްކަތް 2025 ވަނަ އަހަރުގެ މެދުތެރޭގައި ފެށޭނެ ކަމަށް ބުނެފަ އެވެ.

"އަންނަ އަހަރުގެ ހޫނު މޫސުމުގައި ފިލްމުގެ މަސައްކަތް ފަށާނެ، ހުރިހާ ކަމެއް ހުރީ ތައްޔާރަށް" ޓޮމް ބުނެފައިވެ އެވެ.

ސްޕައިޑަ މޭންގެ ހަތަރުވަނަ ފިލްމެއްގެ މަސައްކަތް ކުރިއަށް އޮތްކަން ޓޮމް ޔަގީން ކޮށްދީފައިވާއިރު އެ ފްރެންޗައިޒްގެ ކުރީގެ ފިލްމުތަކުން ފެނުނު ޒެންޑާޔާ މި ފިލްމުން ފެންނާނެ ކަމެއް ޔަގީނެއް ނޫނެވެ.

ޓޮމްއާއި ޒެންޑާޔާ "ސްޕައިޑަ މޭން" ފްރެންޗައިޒްގައި އެކުގައި މަސައްކަތް ކުރުމަށްފަހު މިހާރު އުޅެނީ ލޯބީގެ ގޮތުން ގުޅިގެންނެވެ.