މީގެ ހަތަރު އަހަރު ކުރިން މަރުވެފައި އޮއްވާ ފެނުނު ބޮލީވުޑްގެ އެކްޓަރު ސުޝާންތު ސިންހް ރާޖްޕުތުގެ މަރާ ގުޅިގެން ސީބީއައިއިން ނެރެފައިވާ "ލުކް އައުޓް" އަމުރު އެގައުމުގެ ސުޕްރީމް ކޯޓުން ބާތިލްކޮށްފި އެވެ.

ސުޝާންތުގެ މަރާއެކު ރިއާއާއި އޭނާގެ އާއިލާގެ މެމްބަރުންގެ މައްޗަށް ކުރެވުނު ތުހުމަތުތަކާއެކު އިންޑިއާގެ ސެންޓްރަލް ބިއުރޯ އޮފް އިންވެސްޓިގޭޝަންއިން ވަނީ އޭނާއާއި އޭނާގެ އާއިލާ މީހުންގެ މައްޗަށް "ލުކް އައުޓް" އަމުރެއް ނެރެފަ އެވެ.

މި އަމުރާއެކު އިންޑިއާއިން ބޭރަށް ދަތުރު ކުރުން ފަދަ ކަންކަން ރިއާއާއި އޭނާގެ އާއިލާއަށް މަނާވި އެވެ. ހަމަ އެހެންމެ ފުލުހުންނާއި ސީބީއައިގެ ނަޒަރު އެ އާއިލާއަށް ކެނޑިނޭޅި އޮތެވެ.

އެހެން ނަމަވެސް މިއަހަރުގެ ކުރީކޮޅު ކޯޓުގެ ހާއްސަ ހުއްދައަކާއެކު ރިއާ ވަނީ އިންޑިއާއިން ބޭރުގައި އޮތް އިވެންޓެއްގައި ބައިވެރިވެފަ އެވެ.

ހަބަރުތައް ބުނާ ގޮތުގައި މި މައްސަލަ ބެލުމަށްފަހު ސުޕްރީމް ކޯޓުން ވަނީ އެ އަމުރަކީ އެއްވެސް އަސާސެއް ނެތި ރިއާއާއި އޭނާގެ އާއިލާގެ ހައިސިއްޔަތުގެ ގޮތުން ނެރެފައިވާ އަމުރެއް ކަމަށް ބުނެފަ އެވެ.

އެހެން ކަމުން ރިއާއާއި އޭނާގެ އާއިލާގެ މައްޗަށް އޮތް ލުކް އައުޓް އޯޑަރު ވަގުތުން ބާތިލްކޮށް އެ އާއިލާއަށް މިނިވަންކަމާއެކު އުޅުމުގެ ފުރުސަތު ކޯޓުން ވަނީ ދީފަ އެވެ.

ރިއާއާއި އޭނާގެ އާއިލާއަށް ލުކް އައުޓް އޯޑާއެއް ނެރެފައިވަނީ ސުޝާންތު މަރުވުމުން އޭނާގެ އާއިލާއިން ރިއާއާ ދެކޮޅަށް މައްސަލަ ހުށައެޅުމުންނެވެ.

ރިއާއާއި އޭނާގެ އާއިލާއަށް އޮތް ލުކް އައުޓް އޯޑަރު ބާތިލްވި ނަމަވެސް ސުޝާންތުގެ މަރުގައި އޭނާއަށް ކުރެވޭ ތުހުމަތުތައް އަދިވެސް އެބައޮތެވެ. އެ މައްސަލަ ކޯޓުން ބަލާނީ ޖިނާއީ މައްސަލައެއްގެ ގޮތުގަ އެވެ.