ސަރުކާރުގެ ކުންފުނިތަކުގެ މުވައްޒަފުންގެ މުސާރަ ކުޑަކުރަން ރައީސް ޑރ. މުހައްމަދު މުއިއްޒު ނިންމެވުމުން އިދިކޮޅު މައި ޕާޓީ، އެމްޑީޕީގެ ރައީސް އަބްދުﷲ ޝާހިދު ކަންބޮޑުވުންފާޅުކުރައްވައިފި އެވެ.

އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ ސަރުކާރުގެ ބޭކާރު އިސްރާފު ޚަރަދުތައް ކުޑަ ނުކޮށް، ރައްޔިތުން އަތުން ޓެކްސް ބޮޑުކޮށް ހަމަ އެ ރައްޔިތު މީހާގެ މުސާރައިން ބައެއް ނެގުމަށް ނިންމިކަމީ، ރައްޔިތުން ދޫކޮށް އަމިއްލަ ޖާހަތަށް ޚުދުމުޚްތާރު ވެރިކަމަކަށް ސަރުކާރު މިސްރާބުޖެހި ކަމުގެ ރަނގަބީލެއް ކަމަށެވެ.

ޝާހިދު މިފަދައިން ވިދާޅުވެފައި މިވަނީ ސަރުކާރުގެ ޚަރަދުތައް ކުޑަކުރަން ސިޔާސީ މުވައްޒަފުންނާއި ކުންފުނިތަކުގެ އެމްޑީންގެ އިތުރުން ކުންފުނިތަކުގެ މުވައްޒަފުންގެ މުސާރަ ކުޑަކުރަން ނިންމެވިކަން ރައީސް މުއިއްޒު މިއަދު އިއުލާން ކުރެއްވުމުންނެވެ.

އަމިއްލަފުޅު މުސާރައިން 50 ޕަސެންޓް އުނިކުރަން ވެސް ރައީސް މުއިއްޒު ނިންމެވި އެވެ. އެކަމަކު ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް އުނިކުރަން ނިންމެވުމުން ގިނަ ބަޔަކު އަންނަނީ ކަންބޮޑުވުންފާޅުކުރަމުންނެވެ.

ޚަރަދު ކުޑަކުރުމުގެ ގޮތުން ސިޔާސީ މަގާމްތަކުން 200 އަށްވުރެ ގިނަ މީހުން ވަކިކުރަން ނިންމެވިކަން ރައީސް މުއިއްޒު އިއުލާން ކުރެއްވާފައިވެ އެވެ. ނަމަވެސް މިހާތަނަށް އެއްވެސް މީހަކު މަގާމުން ވަކިކުރިކަން ސަރުކާރުން ހާމަކޮށްފައެއްނުވެ އެވެ.