ހޮލީވުޑްގެ މަޝްހޫރު އެކްޓަރެސް ޖެނިފާ ލޮރެންސްއާއި އޭނާގެ ފިރިމީހާ ކޫކް މެރޯނީއަށް ދެވަނަ ދަރިއަކު ލިބެން އުޅޭކަމަށް ރިޕޯޓުތައް ބުނެފި އެވެ.

އިނގިރޭސި މީޑިއާތަކުން ރިޕޯޓުކުރާ ގޮތުގައި ދާދި ފަހުން ކޫކްއާއެކު ޖެނިފާ ބޭރުތެރެއިން ފެނުނުއިރު އޭނާގެ ބަނޑުން ބަލިވެ އިންކަން އެނގެ އެވެ.

އެ ފެނިލުމުގައި އޭނާ ހުރީ ފެހި ކުލައިގެ ބަޓަން އަޕް އޯވާ ސައިޒް ގަމީހެއް ލައިގެންނެވެ. ބެލެވޭ ގޮތުގައި ބަލިވެ އިންކަން ފޮރުވުމުގެ ބޭނުމުގައި ގަޔަށް ދޫ ހެދުމެއް ލީނަމަވެސް ނޫސްވެރިންނަށް އެކަން ވަނީ ފާހަގަވެފަ އެވެ.

2019 ވަނަ އަހަރު ކައިވެނިކުރި ކޫކްއާއި ޖެނިފާގެ މިހާރުވެސް ދެ އަހަރުގެ ފިރިހެން ކުއްޖަކު ހުރެ އެވެ. އޭނާގެ ނަމަކީ ސައި އެވެ.

ޖެނިފާ ވަނީ 2022 ވަނަ އަހަރު ވޯގް މެގަޒިންއަކަށް ދިން އިންޓަވިއުއެއްގައި އޭނާގެ ދަރިފުޅު ސައި އަކީ "ވޫޑޫ ޑޯލް"އެއް ކަމަށް ބުނެފަ އެވެ.

އެހެންވެ އެ ދުވަސްވަރު އޭނާއަށް މީޑިއާއި އާއްމުންގެ ގިނަ ފާޑުކިޔުންތަކެއް ވެސް އަމާޒުވި އެވެ. ނަމަވެސް އެ ފާޑުކިޔުންތަކަށް ޖެނިފާ ރައްދުދީފައެއް ނުވެ އެވެ.