މި އަހަރަށް އާސަންދައަށް ކަނޑައެޅި 1.9 ބިލިއަން ރުފިޔާގެ ބަޖެޓު ހުސްވެ، ޚަރަދުތައް ދެ ބިލިއަން ރުފިޔާއަށް އަރައިފައިވާކަން އެ ކުންފުނީގެ ތަފާސްހިސާބުތަކުން ދައްކައިފި އެވެ.

ތަފާސްހިސާބުތަކުން ދައްކާ ގޮތުގައި، މި އަހަރުގެ ފުރަތަމަ ކުއާޓަރުގައި އެ ކުންފުނިން 838 މިލިއަން ރުފިޔާއަށް ޚަރަދުކުރި އެވެ. އަދި ދެވަނަ ކުއާޓަރުގައި 823 މިލިއަން ރުފިޔާ ޚަރަދުކޮށްފައިވެ އެވެ. އަދި ތިން ވަނަ ކުއާޓާގެ ޚަރަދު 903 މިލިއަން ރުފިޔާއަށް އަަރާ ޖުމްލަ 2 ބިލިއަން ރުފިޔާއަށް ވުރެ ގިނައިން އެ ކުންފުނިންވަނީ ޚަރަދުކޮށްފަަ އެވެ.

މި ދިޔަ އަހަރާ އަޅާ ބަލާއިރު، މި އަހަރުގެ ތިންވަނަ ކުއާޓަރުގައި އާސަންދައިގެ ދަށުން ފަރުވާ ހޯދި މީހުންގެ އަދަދު ވެސް އިތުރުވެފައިވާ ކަމަށް ތަފާސްހިސާބުތަކުން ދައްކަ އެވެ. މިދިޔަ އަހަރުގެ ތިންވަނަ ކުއާޓަރުގައި ޖުމްލަ 278،255 މީހުން އެ ސްކީމުގެ ދަށުން ފަރުވާ ހޯދާފައިވާއިރު، މި އަހަރުގެ ތިންވަނަ ކުއާޓަރުގައި އެ އަދަދު ވަނީ 280،491 އަށް އިތުރުވެފަ އެވެ.

ރާއްޖޭގެ އެންމެ ހަރަދުބޮޑު އެއް ސްކީމަކީ އާސަންދަ ސްކީމެކެވެ. މި ގޮތުން މި ފަސް އަހަރު އާސަންދައަށް ކުރާ ހަރަދު ވަނީ 60 ޕަސެންޓް ބޮޑުވެފަ އެވެ.

ޚަރަދު ކުޑަކުރަން މި އަހަރު ފިޔަވަޅުތައް ނާޅައިފިނަމަ އާސަންދައަށް ކުރާ ހޭދަ 3.4 ބިލިއަން ރުފިޔާއަށް އަރާނެ ކަމަށް ފިނޭންސް މިނިސްޓްރީއިން ވަނީ މީގެ ކުރިން ބުނެފަ އެވެ.

އާސަންދައިގެ ދަށުން ބޭހަށް ކުރާ ހަރަދަކީވެސް އިސްރާފު ބޮޑު ހަރަދެެެކެވެ. އަހަރަކު 500 މިލިއަނަށް ވުރެ ގިނައިން ހަރަދުވާތީ، ބޭހުގެ ޚަރަދުތައް ކުޑަ ކުރުމަށް ފިޔަވަޅުތަކެއްވެސް މި ސަރުކާރުން ވަނީ އަޅާފަ އެވެ. ސަރުކާރުން ވަނީ ބަލްކް ޕްރޮކިއުމަންޓް ނިޒާމުގެ ދަށުން އަގުހެޔޮކޮށް މޮޅު ބޭސް ގެންނަން ވެސް ފަށައިފަ އެވެ.

ހަމައެއާއެކު އާސަންދަ އަދި އެންސްޕާގެ ދަށުން ފައިސާ ދޫކުރުމުގައި ކޮރަޕްޝަނަށް މަގުފަހިވާ ކަމަށް އެންޓި ކޮރަޕްޝަން ކޮމިޝަން (އޭސީސީ)ގެ ދިރާސާއިން މި ފަހުން ވަނީ ދައްކާފަ އެވެ.