އޭނާގެ އަމިއްލަ ކޮޓަރީގައި އެކަނި ނިދުމަކީ ބިރުވެރި ކަމެއް ކަމަށް ހޮލީވުޑްގެ މަޝްހޫރު ލަވަކިޔުންތެރިޔާ ސެލީނާ ގޯމޭޒް ބުނެފި އެވެ.

ސެލީނާ މިހެން ވާހަކަ ދައްކާފައިވަނީ އޮކްޓޯބަރު މަހުގެ 10 ވަނަ ދުވަހު ފާހަގަކުރާ ދުނިޔޭގެ ނަފްސާނީ ސިއްހަތުގެ ދުވަހާ ގުޅުވައިގެން ދިން އިންޓަވިއުއެއްގަ އެވެ.

އެކަނި ނިދުމަކީ އޭނާއަށް ނުތަނަވަސް ތަޖުރިބާތަކެއް ކުރެވޭ ކަމެއް ކަމަށް ސެލީނާ ބުންޏެވެ. އެގޮތުން ނިދަން އޮށޯތުމުން ސްޓްރެސްއާއި ޑިޕްރެޝަން އިތުރަށް ބޮޑުވާ ކަމަށެވެ.

"ގިނަ ބަޔަކަށް އެމީހުންގެ އެނދަކީ އެންމެ ރައްކާތެރި އެއް ތަން. އެކަމަކު އަހަންނަށް އެއީ ބިރުވެރި ހޮހޮޅައެއް" ސެލީނާ ބުނެފައިވެ އެވެ.

ސެލީނާއަށް ބައިޕޯލާ ޑިސްއޯޑާ ބަލި ޖެހިފައިވާކަން 2020 ވަނަ އަހަރު އެނގުނު ފަހުން އޭނާ އަންނަނީ އޭނާގެ ނަފްސާނީ ސިއްހަތުގެ ވާހަކަތައް އާއްމުންނާ ހިއްސާ ކުރަމުންނެވެ.

އޭގެ އިތުރުން ވެސް ސެލީނާއަކީ މިހާރު ނަފްސާނީ ދުޅަހެޔޮކަމަށް ވަކާލާތުކުރާ އެކްޓިވިސްޓެއް ވެސްމެ އެވެ. އޭނާ ވަނީ ނަފްސާނީ ސިއްހަތަށް ހޭލުންތެރިކުރުމަށް ގިނަ މަސައްކަތްތަކެއް ކޮށްފަ އެވެ.