ބޮލީވުޑްގެ އަރަމުން އަންނަ ތަރި ޓްރިޕްތީ ޑިމްރީގެ ހަޔާތުގެ ބައިވެރިޔާގެ ކިބައިގައި ހުންނަން އޭނާ ބޭނުންވާ ސިފަތައް ކިޔައިދީފި އެވެ.

ރަންވީރު އައްލާބާދިއާގެ ޕޮޑްކާސްޓެއްގައި ވާހަކަ ދައްކަމުން ޓްރިޕްތީ ބުނީ އޭނާ ބޭނުންވަނީ 1994ގެ ފިލްމު "ކަބީ ހާން ކަބީ ނާ"ގައި ޝާހްރުކް ޚާން ކުޅެދީފައިވާ ކަހަލަ މީހެއް ކަމަށެވެ.

އެ ފިލްމުގައި ޝާހްރުކް ޚާންގެ ކެރެކްޓަރު "ސުނިލް" އޭނާގެ ލޯބިވެރިޔާއަށް އޭނާދެކެ ލޯބިވާކަން ހާމަކޮށްދޭ ގޮތަކީ އޭނާގެ އަސްލު ދިރިއުޅުމުގައި ވެސް ބޭނުންވާ ކަމަށް ޓްރިޕްތީ ބުންޏެވެ.

އެ ފިލްމަކީ އޭނާއަށް އެންމެ ކަމުދާ އެއް ފިލްމު ކަމަށް ބުނަމުން ޓްރިޕްތީ އިތުރަށް ބުނީ އެ ފިލްމުގައި ދައްކުވައިދީފައިވާ މައުސޫމު ލޯބީގެ ސަބަބުން އެއީ އެންމެ "ރޮމޭންޓިކް" ފިލްމު ކަމަށެވެ.

"އަހަންނަށް އެނގޭ އަހަންނަށް އެންމެ ފުރިހަމަ މީހަކު ނުލިބިދާނެކަން. އެކަމަކު ވެސް އެއާ އެންމެ ގާތްކުރާ މީހަކު ބޭނުންވަނީ" ޓްރިޕްތީ ބުންޏެވެ.

މިދިޔަ އަހަރު ރިލީޒްކުރި ފިލްމު "އެނިމަލް"އިން ގިނަ ބައެއްގެ ސަމާލުކަން ހޯދި ޓްރިޕްތީ ވަނީ ކުޑަ ދުވަސްކޮޅެއްގެ ތެރޭގައި ގިނަ ބައެއްގެ މަގުބޫލުކަން ހޯދާފަ އެވެ.

ޓްރިޕްތީގެ ކުރިއަށްހުރި މަސައްކަތްތަކަށް ބަލާއިރު އެންމެ އަވަހަށް އޭނާ ފެންނާނީ މިއަހަރުގެ ދިވާލީއާ ދިމާކޮށް ރިލީޒް ކުރަން ހަމަޖެހިފައިވާ "ބޫލް ބުލައްޔާ 3" އިންނެވެ.