މަގާމުން ވަކިވެވަޑައިގެން ޕްރޮސިކިއުޓާ ޖެނެރަލްކަން ފާއިތުވި ހަތަރު އަހަރު ކުރެއްވި ހުސައިން ޝަމީމް ޕީޖީ އޮފީހުން މިރޭ ނުކުމެވަޑައިގަތީ ރަތްދޫލަ މަތިންނެވެ. އެއީ ޝަމީމްގެ ހިދުމަތަށް ޝުކުރު އަދާކުރުމުގެ ގޮތުން ޕީޖީ އޮފީހުގެ މުވައްޒަފުން ކީ ރަތްދޫލައިގެ އަލްވަދާއުއެކެވެ.

ޝަމީމްގެ އިސްތިއުފާގެ ސިޓީ ރައީސް އޮފީހަށް ލިބިފައިނުވާތީ ރައްޔިތުންގެ މަޖިލީހުން މިއަދު ވަނީ އޭނާ މަގާމުން ވަކިކުރަން ފާސްކޮށްފަ އެވެ. ޝަމީމް އިސްތިއުފާ އިއުލާން ކުރެއްވިޔަސް މަޖިލީހުގައި އޭނާ ވަކިކުރަން ވޯޓު ނެގި ވަގުތާ ހަމައަށް ވެސް އިސްތިއުފާގެ ސިޓީ ލިބިފައިނުވާ ކަމަށް ރައީސް އޮފީހުން މައުލޫމާތު ދީފައިވާ ކަމަށް ޖަލްސާގެ ރިޔާސަތުގައި އިންނެވި މަޖިލީހުގެ ނައިބު ރައީސް އަހްމަދު ނާޒިމް ވިދާޅުވި އެވެ.

މަގާމުން ވަކިކުރާތީ މިއަދު ބޭއްވި ނޫސްވެރިންގެ ބައްދަލުވުމެއްގައި ޝަމީމް ވިދާޅުވީ ފާއިތުވި މުއްދަތުގައި މަގާމުގެ މަސްއޫލިއްޔަތު އަދާކޮށްފައި ވާނީ ގާނޫނޫ އަސާސީ އާއި ގާނޫނުތަކާ އެއްގޮތްވާގޮތުގެމަތިން ކަމަށެވެ.

ޝަމީމް ވިދާޅުވީ އޭނާއަށް ނުފޫޒުފޯރުވަން އެކި ފަރާތްތަކުން މަސައްކަތް ކުރިޔަސް އެއިން ކަމެއް ކާމިޔާބުވެފައިނުވާ ކަމަށެވެ.

"އަޅުގަނޑަށް ނުފޫޒު ފޯރުވުމަށް އެކި ބޭފުޅުން ސީދާގޮތުންނާއި ނުސީދާގޮތުން މަސައްކަތްކުރެއްވި ނަމަވެސް، އަޅުގަނޑުގެ މައްޗަކަށް ނުފޫޒެއް ނުފޯރުވޭނެ،" ޝަމީމް ވިދާޅުވި އެވެ.

ފާއިތުވެދިޔަ ފަސް އަހަރު ދައުލަތުގެ މުއައްސަސާތަކާއި އިދާރާތަކުން މައުލޫމާތާއި ތަފާސްހިސާބު އާއްމުކޮށްފައިވާ މިންވަރަށް ބައްލަވައިފިނަމަ، ޕީޖީ އޮފީހަކީ އާދަޔާ ޚިލާފަށް ހާމަކަން ބޮޑު ގޮތެއްގައި، ދެ ފުށްފެންނަ ގޮތެއްގައި މައުލޫމާތާއި ތަފާސްހިސާބު އާއްމުކުރަމުން އަންނަ އޮފީހެއް ކަމަށް ޝަމީމް ވިދާޅުވި އެވެ.

އޭނާ ފޮރުވި ކަމެއް ނުވަތަ އޮޅުވާލި ކަމެއްވެސް ނޯންނާނެ ކަމަށް ޝަމީމް ވިދާޅުވި އެވެ.

ޕްރޮސިކިއުޓާ ޖެނެރަލްގެ މަގާމުން ހުސްވާތާ 30 ދުވަހުގެ ތެރޭގައި އެ މަގާމަށް ބޭފުޅަކު އައްޔަން ކުރަންޖެހޭނެ ކަމަށް ގާނޫނުގައި ބަޔާންކޮށްފައިވެ އެވެ.