ކޮވިޑް-19 ގެ ދުވަސްވަރު އައިޖީއެމްއެޗުގެ ލެބޯޓަރީގައި ބޭނުންކުރި "ރީއެޖެންޓްސް" އިން އަމިއްލަ މަސްލަހަތު ހިމެނޭ ކުންފުންޏަކަށް ނާޖާއިޒު މަންފާ ހޯދައިދިނުމާއި އަމިއްލައަށް ނާޖާއިޒު މަންފާ ހޯދުމުގެ ތުހުމަތުގައި އެ ހޮސްޕިޓަލްގެ ކުރީގެ ސީއީއޯ އިބްރާހީމް ސަލީމް (ބަންދު ސަލީމް) އާއި އެ ހޮސްޕިޓަލުގެ ޕްރޮކިއުމަންޓް ކޮމިޓީގެ ޗެއާމަނަކަށް އޭރު ހުންނެވި ޑރ. އަލީ އަބްދުﷲ ލަތީފާއި އިތުރު ބޭފުޅެއްގެ މައްޗަށް ދައުވާކޮށްދިނުމަށް އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސިކިއުޓާ ޖެނެރަލްގެ އޮފީހަށް ފޮނުވައިފި އެވެ.

އެ ދެ ބޭފުޅުންގެ އިތުރުން ދައުވާކޮށްދޭން އެދުނީ އައިޖީއެމްއެޗުގެ ލެބޯޓަރީގެ ކުރީގެ ހެޑް ޑރ. މިލްޒާ އަބްދުލްމުހުސިންގެ މައްޗަށެވެ.

އޭސީސީން އެދިފައި ވަނީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށުގެ ދައުވާ އެ ތިން މީހުންގެ މައްޗަށް ކޮށްދިނުމަށެވެ.

ޑރ. އަލީ ލަތީފަކީ އައިޖީއެމްއެޗުގެ މެޑިކަލް އެގްޒެކެޓިވް ކޮމިޓީގެ މެންބަރުކަމާއި، ޓެކްނިކަލް އެޑްވައިޒަރީ ކޮމިޓީގެ މެންބަރު ކަމުގެ އިތުރުން ކޮވިޑާ ގުޅިގެން އެކުލަވާލި ޓެކްނިކަލް އެޑްވައިޒަރީ ގްރޫޕްގެ މެންބަރުކަން ކުރެއްވި ބޭފުޅެކެވެ.

އެ ތިން ބޭފުޅުން ނާޖާއިޒް ފައިދާ ހޯދައިދީފައި ވަނީ އާރުއެމްއެލްއެސް ލެބް ސާވިސަސް އަށެވެ. އަދި އެ ކުންފުނި މެދުވެރިކޮށް ޑރ. އަލީ ލަތީފު މަނީ ލޯންޑާ ކޮށްފައިވާ ކަމަށް ތުހުމަތު ކުރެވޭތީ އެ މައްސަލަ ތަހުގީގުކޮށްދިނުމަށް ފުލުސް އޮފީހުގައި ވެސް އެ ކޮމިޝަނުން ވަނީ އެދިފަ އެވެ.

އެ ލެބޯޓަރީ ހިންގަނީ އޮކްޓޯބަރު 2020 ވަނަ ދުވަހު ވުޖޫދުވި ޕަޔޮނިއާ މޯލްޑިވްސް ނަމަކަށް ކިޔާ ކުންފުންޏެއްގެ ދަށުންނެވެ. އެ ކުންފުނީގެ ހިއްސާދާރުންނަށް ތިބީ ޑރ. އިކުލީލް ޝަރީފާއި އިބްރާހިމް ސައީދު މުހައްމަދު އެވެ. ރާއްޖޭން ކޮވިޑު ފެނުނީ މާޗު 2020, ގަ އެވެ.

މި މައްސަލައިގައި، ޑރ. އަލީ ލަތީފާއި ޑރ. މިލްޒާ ގުޅިގެން ފާހަގަކުރެވުނު ކަންކަން މޯލްޑިވްސް މެޑިކަލް ކައުންސިލްގެ ސަމާލުކަމަށް ގެނެސް، އެ ދެ ބޭފުޅުންނާ މެދު ފިޔަވަޅެއް އަޅަންޖެހޭ ނަމަ އެފަދަ ފިޔަވަޅެއް އެޅުމަށްފަހު އެކަން ހިއްސާ ކޮށްދިނުމަށް އެދިފައިވާ ކަމަށް އެ ކޮމިޝަނުން ބުންޏެވެ.