މުސްލިމަކަށް ވީތީ ބޮލީވުޑްގައި އެއްވެސް ކަހަލަ ތަފާތުކުރުންތަކަކާ ކުރިމަތިލާން ނުޖެހޭ ކަމަށް މަޝްހޫރު ތަރި ނަވާޒުއްދީން ސިއްދީގީ ބުނެފި އެވެ.

ދާދި ފަހުން އާއްމުވި ޕޮޑްކާސްޓެއްގައި ވާހަކަ ދައްކަމުން ނަވާޒުއްދީން ބުނީ ވަކި ދީނަކަށް ނިސްބަތްވާތީ ފުރުސަތުތައް ހަނި ނުވާކަމަށާއި ބޮލީވުޑްއަކީ އެގޮތުން ބަލާއިރު ނަމޫނާ ދާއިރާއެއް ކަމަށެވެ.

"މުސްލިމުންނާއި ހިންދޫންނަށް ވެސް ބޮލީވުޑްގައި އެންމެން އިހުތިރާމް ކުރޭ. މުޖުތަމައުން ޖެހޭ މި ނަމޫނާ ބަލައިގަނެ އެއަށް އަމަލު ކުރަން ޖެހޭ،" ނަވާޒުއްދީން ބުންޏެވެ.

އޭނާގެ މިހާރުގެ މަސައްކަތްތަކާ ބެހޭ ގޮތުން ނަވާޒުއްދީން ބުނީ ސިޔާސީ ދާއިރާއާއި ކުޅިވަރަށް އޭނާގެ މާބޮޑު ޝައުގެއް ނެތް ކަމަށާއި އޭނާ ދެމިހުންނާނީ ފިލްމު ކުޅުމުގައި ކަަމަށެވެ.

"ގޭންގްސް އޮފް ވަސޭޕުރް"އާއި "ބަޖްރަންގީ ބައިޖާން"ފަދަ ފިލްމުތަކުން ފެނިފައިވާ ނަވާޒުއްދީީންގެ އެންމެ ފަހުގެ މަސައްކަތަކީ ޒީ5ގައި މިއަދު ރިލީޒްކުރާ "ރައުތޫ ކާ ރާޒް" ފިލްމެވެ.