ފްރާންސުން ސްރީލަންކާ އާއި ރާއްޖެއަށް ކަނޑައަޅާފައިވާ ސަފީރު ޖޯން-ފްރަންސުއާ ޕަކްތެތު ކުއްލި ގޮތަކަށް މިއަދު އަވަހާރަވެއްޖެ އެވެ.

ސްރީލަންކާގެ ފުލުހުން ވަނީ އެކަން މީޑިއާތަކަށް ކަށަވަރުކޮށްދީފަ އެވެ. އުމުރުން 53 އަހަރުގެ ޕަކްތެތް އަވަހާރަވެފައި އޮއްވާ ފެނިފައިވަނީ ލަންކާގައި އޭނާ ދިރިއުޅުއްވާ ގެކޮޅުން ކަމަށް އެ ގައުމުގެ ފުލުހުން ބުންޏެވެ. އޭނާ އަވަހާރަވިކަން އެނގުނީ ދިރިއުޅުއްވާ ކޮޓަރިން މިއަދު ނިކުމެވަޑައިނުގަތުމުން، ބެލި ބެލުމުން ކަމަށް ވެސް ލަންކާގެ ނޫސްތަކުގައި ރިޕޯޓްކޮށްފައިވެ އެވެ.

އެ މައްސަލައިގެ ތަހުގީގަށް އޭނާ ހަށިގަނޑުގެ ޕޯސްޓްމޯޓަމް ހެދުމަށް ލަންކާގެ ފުލުހުން ވަނީ ނިންމާފަ އެވެ.

މިކަމާ ގުޅިގެން ރާއްޖޭގެ ފޮރިން މިނިސްޓަރު މޫސާ ޒަމީރު ވިދާޅުވީ ސަފީރު އަވަހާރަވި ހަބަރު އެހީ ފުން ހިތާމައާއެކު ކަމަށާއި ރާއްޖެއާއެކު އޭނާ ބޭއްވެވި ގާތްގުޅުން އަބަދުވެސް ހަނދާން ކުރައްވާނެ ކަމަށެވެ.

ސަފީރު އަވަހާރަވުމުގެ ހިތާމައިގައި އޭނާގެ އާއިލާއަށާއި ފްރާންސް އެމްބަސީގެ މުވައްޒަފުންނަށް މިނިސްޓަރު ޒަމީރު ވަނީ ތައުޒިޔާ ފޮނުއްވާފަ އެވެ.