ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި ހަރަކާތްތެރިވި ދިވެއްސެއްގެ ލަގެޖުން ފަސް ކިލޯގެ މަސްތުވާތަކެތި ފެނުނު މައްސަލައިގައި އެ މީހާ ހައްޔަރުކޮށް ބަންދުގެ މުއްދަތުގެ ޖަހައިފި އެވެ.

މި މައްސަލައިގައި ފުލުހުން ހައްޔަރު ކުރީ އުމުރުން 32 އަހަރުގެ ދިވެހި ފިރިހެނެކެވެ. އޭނާގެ ބަންދާ މެދުގައި ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން އެ ކޯޓުން ވަނީ އޭނާގެ ބަންދަށް 15 ދުވަސް ޖަހައިފަ އެވެ.

އެ ޒުވާނާގެ ބަންދު އަމުރުގައި ބުނެފައި ވަނީ އެ ލަގެޖު އިންޓަނޭޝަނަލް ޓާމިނަލުން ޑޮމެސްޓިކް ޓާމިނަށް އެ މިހާ ގެންދިޔައީ އެއާޕޯޓުގެ އުސޫލުތަކާ ހިލާފަށް ކަން ފުލުހުން ތުހުމަތު ކުރާ ކަމަށެވެ.

ފުލުހުން ވަނީ ސީސީޓީވީ ފުޓޭޖުގެ ޝޮޓްތަކުގެ އިތުރުން ލަގެޖުން ފެނުނު ތަކެތި ތަހުލީލުކޮށް ތައްޔާރުކޮށްފައިވާ ރިޕޯޓެއް ވެސް ކޯޓަށް ހުށަހަޅައިފަ އެވެ.

ހައްޔަރުކުރި މީހާގެ މައްޗަށް ކުރާ ތުހުމަތުތަކަށް އެމީހާ އިންކާރު ކުރެ އެވެ. އެ ލަގެޖު ގެންދިޔައީ މީހަކު ބުނެގެން ކަމަށާއި އެއީ އޭނާގެ ލަގެޖެއް ނޫން ކަމަށް ކޯޓުގައި ބުނެފައިވެ އެވެ.

މިމައްސަލައިގައި ފުލުހުން ވަނީ ތުހުމަތު ކުރެވޭ މިންވަރަށް ހެކި ހުށަހަޅައިފަ އެވެ. އެގޮތުން ހެކިންގެ ބަޔާންތަކާއި، ސީސީޓީވީ ފުޓޭޖް ސްނެޕްޝޮޓްތަކާއި ތަހުލީލު ރިޕޯޓުތަކާއި ސީން އޮފް ކްރައިމް އޮފިސަރސް ރިޕޯޓާއި އިތުރު ހެކި ގަރީނާ ފުލުހުން ހުށަހެޅި އެވެ.