ބޮލީވުޑް ސުޕަ ސްޓާ ޝާހްރުކް ޚާންގެ އެންމެ ފަހުގެ ފިލްމު "ޖަވާން"އަށް ބައިނަލްއަގްވާމީ އެވޯޑެއްގެ ނޮމިނޭޝަންއެއް ލިބިއްޖެ އެވެ.

ޖަވާންއަށް އެ ނޮމިނޭޝަން ލިބިފައިވަނީ ހޮލީވުޑް ކްރިއޭޓިވް އެލައަންސްއިން އިންތިޒާމުކުރާ "އަސްޓްރާ އެވޯޑްސް 2024"ގެ އިންޓަނޭޝަނަލް ފީޗާ ކެޓެގަރީއިންނެވެ.

ޖަވާންއާއެކު ދެން އެ ކެޓަގަރީއަށް 10 ފިލްމެއް ވާދަކުރާއިރު އޭގެ ތެރޭގައި ދުނިޔޭގެ އެކި ކަންކޮޅުތަކުގެ ފިލްމުތައް ހިމެނެ އެވެ. ޖަވާންއަކީ މިއަހަރު އެ އެވޯޑުގެ ކެޓަގަރީއަކަށް ނޮމިނޭޓްވި ހަމައެކަނި ހިންދީ ފިލްމެވެ.

އަސްޓްރާ އެވޯޑްސްގެ އެހެން ކެޓަގަރީތަކަށް ވާދަކުރާ ފިލްމުތަކުގެ ތެރޭގައި ބާބީ، އޯޕަންހައިމާ، ޖޯން ވިކް، ސްޕައިޑާ މޭން: އެކްރޮސް ދަ ސްޕައިޑާ ވާސް ފަދަ ބްލޮކްބަސްޓާ ފިލްމުތައް ހިމެނެ އެވެ.

އަތްލީ ޑައިރެކްޓްކޮށް މިއަހަރު ސެޕްޓެމްބަރު މަހު ނެރުނު ޖަވާންގައި ޝާހްރުކް ޚާންގެ އިތުރުން ނަޔަންތުރާ، ވިޖޭ ސެތުޕަތީ، ރިދީ ޑޯގްރާ އަދި ދީޕިކާ ޕަދުކޯން މުހިއްމު ރޯލުތަކުން ފެނިގެންދެ އެވެ.

ޖަވާން ވަނީ އިންޑިއާގެ އިތުރުން ބައިނަލްއަގްވާމީ ބޮކްސް އޮފީހުގެ ވެސް ގިނަ ރެކޯޑުތަކެއް މުގުރާލައި ރެކޯޑު އާމްދަނީއެއް ހޯދާފަ އެވެ.