ދިވެހިންގެ ތެރޭގައި ވެސް މަގުބޫލު ހިންދީ ޓީވީ ޝޯއެއް ކަމަށްވާ "ތާރަކް މެހްތާކާ އުލްޓާ ޗަސްމާ" 15 އަހަރަށްފަހު ނިންމާލަން އުޅޭ ކަމަށް އަޑުތައް އަރައިފި އެވެ.

ހަބަރުތައް ބުނާ ގޮތުގައި އެ ޝޯގެ ޕްރޮޑިއުސަރުން އެ ނިންމުން ނިންމާފައިވަނީ ޓީވީ ޝޯތަކުގެ ރޭޓިން ބަލާ މިންގަނޑު ކަމަށްވާ ޓީއާރްޕީ ޗާޓުން އެ ޝޯގެ ރޭޓިން ދަށްވުމުންނެވެ.

މީގެ ތިން ހަފްތާ ކުރިއަށް ބަލާއިރު ޝޯއިން ވަކިވެފައިވާ "ދާޔާބެން" އަނބުރާ އަންނަ ކަމުގެ އަޑުތައް ފެތުރުމުން ޝޯގެ ޓީއާރްޕީ މައްޗަށް ދިޔަ އެވެ.

އެހެން ނަމަވެސް އެކަން ހަގީގަތަކަށް ނުވުމުން ބެލުންތެރިން ޝޯ މަތިން ފޫހިވެ ޝޯ ބެލުން ހުއްޓާލީ ކަމަށް ރިޕޯޓުތައް ބުނެ އެވެ. "ތާރަކް މެހްތާކާ އުލްޓާ ޗަސްމާ"ގެ ޕްރޮޑިއުސަރުން އަންނަނީ އެޝޯގެ ބެލުންތެރިންނަށް ދަޅަ ދައްކަމުން ކަމަށް އާއްމުން ބުނެ އެވެ.

"ދާޔާބެން"އަކީ "ތާރަކް މެހްތާކާ އުލްޓާ ޗަސްމާ"ގެ މައި ކެރެކްޓަރުންގެ ތެރޭގައި ހިމެނޭ ކެރެކްޓަރެކެވެ. އެހެން ނަމަވެސް އެ ކެރެކްޓަރު ކުޅޭ އެކްޓަރު ޝޯއިން ވަކިވުމުން އެ ކެރެކްޓަރު ވެސް ގެއްލުނީ އެވެ. މި ކެރެކްޓަރަކީ އެ ޝޯއިން އާއްމުން އެންމެ ލޯބިކުރި އެއް ކެރެކްޓަރެވެ.