2019 ވަނަ އަހަރު ނުކުތް ފިލްމު "ކަބީރު ސިންހް"އަކީ އެއަހަރު ނުކުތް އެންމެ ކާމިޔާބު ބޮލީވުޑް ފިލްމެވެ. ޝާހިދު ކަޕޫރާއި ކިއާރާ އަދްވާނީ ލީޑު ރޯލުން ފެނިގެންދިޔަ އެ ފިލްމު ގިނަ ބައެއްގެ ހިތް އަތުލި އެވެ.

ދާދި ފަހުން ދިން އިންޓަވިއުއެއްގައި މި ފިލްމާ ބެހޭ ގޮތުން ވާހަކަ ދައްކަމުން އެ ފިލްމުގެ ޑައިރެކްޓަރު ސަންދީޕް ރެޑީ ވެންގާ މިވަނީ ކުރިން ނޭނގޭ އެތައް ވާހަކައެއް ހިއްސާކޮށްފަ އެވެ.

އެގޮތުން ކަބީރު ސިންހްގެ ރޯލަށް އޭނާ އަސްލު ބޭނުންވީ ޝާހިދު ކަޕޫރު ނޫން ކަމަށާއި ރަންވީރް ސިންހް ކަމަށް ސަންދީޕް ބުންޏެވެ. އެހެން ނަމަވެސް ރަންވީރު އެ ހުށައެޅުމަށް އިިންކާރު ކުރުމުން ޝާހިދު ކަޕޫރަށް ފުރުސަތު ދިނީ ކަމަށް ސަންދީޕް ވަނީ ބުނެފަ އެވެ.

"އެ ކެރެކްޓަރުގެ ގޮތުން އޭނާއަށް އާއްމުންގެ ނަފްރަތު އަމާޒު ވެދާނެތީ ރަންވީރު ބޭނުމެއް ނުވި ހުށައެޅުން ގަބޫލު ކުރާކަށް" ސަންދީޕް ބުންޏެވެ.

ސަންދީޕް އިތުރަށް ބުނީ އެ ރޯލަށް ޝާހިދު ކަޕޫރު ހަމަޖެއްސުމުން އެކަން ނުކުރުމަށް ވެސް ގިނަ ބަޔަކު ލަފާ ދިން ކަމަށާއި ޝާހިދުއާއެކު ފިލްމު ކާމިޔާބު ނުވާނެ ކަމަށް ވެސް ގިނަ ބަޔަކު ބުނި ކަމަށެވެ.

ކަބީރު ސިންހްގައި ޝާހިދު ދައްކުވައިދިން މޮޅު އެކްޓިންއަށް އާއްމުންގެ ތައުރީފް ލިބުނުއިރު އެ ރޯލަށް އެހެން ތަރިއަކު ހިތަށް ގެނުވުމަކީ އުނދަގޫ ކަމެއް ކަމަށް ގިނަ މީހުން އަންނަނީ ބުނަމުންނެވެ.